﴿بِاسْمِهٖ سُبْحَانَهُ﴾
عموم دوستلريمه و نور قارداشلريمه بو وصيتى إعلان ايدييورم: بن شخصم إعتباريله وظيفۀِ نوريهيى ياپمغه طاقتم قالمامش. بلكه إحتياج ده قالمامش. هم متعدّد تسمّملرله و چوق إختيارلق وضعيتيله و خستهلقله شيمديكى حياتده قالمق، تحمّلم قالمامش گبيدر. شايد مشتاق اولديغم ئولوم أليمه گچمهسه ده، ظاهرى حياتمده ئولمشم گبى دييه بو وصيتمى يازييورم.
خالقِ رحمٰنِ رحيمه حدسز شكر اولسون كه؛ بوندن آلتمش يتمش سنه أوّل خلافِ عادت اولارق تحصيلِ علم، خصوصًا علمِ ايمانى يولنده باشقهلرڭ معاونتنه يالوارمامق و تام فقرِ حاليله برابر أسكى سعيد چوجقلق، گنجلك زماننده طلبهلرينه تعيينلرينى كندى ويرمگه چاليشديغى و آنجق قيصه بر زمان بش تعيين قبول ايدوب متباقى طلبهلرينه بعضًا يگرمى اوتوز طلبهسنه تعيين ويرديگندن؛ علمى، واسطۀِ جر ايتمگه او طلبهلر مجبور اولماديلر. إقتصاد و قناعتله او زمان موفّق اولدقلرى گبى، جنابِ أرحم الرّاحمينه حدسز شكر اولسون كه، أسكى سعيد گبى شيمدى رسالۀِ نور كندى حقيقى طلبهلرينڭ تعيينلرينى نشرياتيله مكمّل ويرمگه باشلامش. أعظمى إخلاصى قيرمامق ايچون رسالۀِ نور خاص طلبهلرينه، خصوصًا نفقهسنى تدارك ايدهمهينلرى تام تامنه إداره ايدهجك درجهده رسالۀِ نورڭ صاتيلان نسخهلرينڭ بشدن بريسى رسالۀِ نورڭ حقّى اولديغى جهتله شيمدى أللى آلتمش طلبهسنه كافى سرمايهسى چيقييور. بنم (بيچاره سعيدڭ) ايچنده هيچ بر حقّى يوقدر. يالڭز رسالۀِ نورڭ قيمتدار خاصيتى و شاكردلرينڭ شخصِ معنويسنڭ كمالِ صداقتى بو معنوى نور بايرامنه وسيله اولدى.