﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلريمز!
أوّلا: استاديمز ليلۀِ برائتڭزى تبريك ايدييور. هم سلام و دعا ايدييور.
ثانيًا: دياربكردن دون آلديغمز مكتوبده إفاده ايديلديگنه گوره، دياربكر حواليسيله برابر شرقده شيمدى ايكى يوز قدر نور درسخانهلرى آچيلمش. آيريجه دياربكرده قادينلره مخصوص درت بش درسخانۀِ نوريه وارمش. إن شاء اللّٰه بو بيوك بر خيرڭ علامتيدر.
استاديمز اون سنه أوّل إشارت و بيوك منفعتنى بيان ايتديگى نور مدرسهلرينڭ شيمدى بو زمانده آچيلمه ايشى، تام تحقّق صفحهسنه گيرمش بولونويور. او زمان ديمشدى: «شيمدى رسمًا دين تدريساتى ايچون خصوصى درسخانهلر آچيلمهسنه إذن ويريلمسنه بناءً نور شاكردلرى ممكن اولديغى قدر هر يرده كوچوجك بر درسخانۀِ نوريه آچمق لازمدر. گرچه هركس كندى كندينه بر درجه إستفاده ايدر، فقط هركس هر بر مسئلهسنى تام آڭلاماز. ايمان حقيقتلرينڭ ايضاحى اولديغى ايچون؛ هم علم، هم معرفت اللّٰه، هم حضور، هم عبادتدر. أسكى مدرسهلرده بش اون سنهيه مقابل، إن شاء اللّٰه نور مدرسهلرى بش اون هفتهده عين نتيجهيى تأمين ايدهجك و يگرمى سنهدر ايدييور.»
استاديمز بارلادهكى طوقوز سنهلك إقامتگاهى اولان و رسالۀِ نورڭ برنجى درسخانهسى، هم آلتى ولايت گنيشلگندهكى مدرسة الزهرانڭ چكردگى بولونان