رابعًا: حاكمِ عادلدن صوڭره أڭ زياده حقيقى عدالته چاليشوب رسالۀِ نورڭ سربستيتنه خدمت ايدن «م ح ر م» أڭ خالص شاكردلر ايچنده و بنم ئوز قارداشم و برنجى طلبهم ملا محمد إسميله اونڭ نامى، دعالرمده و معنوى قزانجلرمده برابردرلر.
خامسًا: بو ساعتده قونيهلى صبرى ده؛ (خليل إبراهيم و حسن فيضى طرزنده وصيتنامهم مناسبتيله) قيصه فقط گوزل بر قصيده يازمش، استادينه چوق زياده قيمت ويرمش. كندى حسنِ ظنّنڭ پارلاق آيينهسنده، بو بيچاره قارداشنه فوق العاده أهمّيت ويرمش. و اورانڭ عالملرى پك جدّى نوره چاليشمالرينى يازييور.
بن ده ديرم: او استاد نامى ويرديگى و چوق قيمت ويرديگى شخص ايسه، رسالۀِ نورڭ شخصِ معنويسى اولابيلير. بن ده اونڭ نامنه قبول ايتدم، لاحقهيه گچيردم؛ هم سزه ده بر صورتنى گوندردم.
مراق ايتمهيڭز، خستهلغم گيتدكجه خفيفلشييور. إسپارطهلى مصطفى نامنده بر قارداشمزڭ صميمى، فقط غريب بر مكتوبى ايچنده واردى. بو ذات هانگى مصطفىدر، بيلهمدم. اوڭا ده چوق سلام ايدرم. عجيب رؤياسى خيردر، شيمدى تعبير ايدهمم.
عموم قارداش و همشيرهلريمزه برر برر سلام و دعا ايدرز، مقبول دعالرينى ايسترز.
حسن فيضىنڭ گوزل قصيدهسنى، بعض كلمهلرى علاوه ايله لاحقهيه گچيردك و سزه ده گوندردك.
سعيد النورسى
* * *