هم رأفت بگڭ مبارك مخدومى حسنىنڭ كوچك رسالهسنڭ آخرينه دعاسنى يازدى، اونى ده لفًّا گوندرييورز. جنابِ حقّه حدسز شكر اولسون كه؛ هم نورجى، هم جدّى دوست، هم متديّن بر قائمِ مقام، شيمدى بورايه قائمِ مقام اولمش. أسكيده سزه گوندريلن «داخليه وكيلى ايله بر حسبحال» نامندهكى پارچهيى دخى گوندرييورز. اونى ده استاد اوڭا اوقويهجق.
* * *
قهرمان نظيفڭ و يعقوب جمالڭ، شمالِ غربىده اوچ دولتڭ قرآنى قبول ايتمهسى ذو الفقارڭ إنتشارينه توافقى؛ و گچن سنه، ذو الفقار چيقارسه، داخلاً و خارجًا بيوك فتوحاته وسيله اولاجق حكمنى تصديق ايتمهسى بيوك بر فالِ خيردر دييه بز ده او ايكى قارداشمزڭ قناعتنه إشتراك ايدييورز. بو فورطنهلى و إلحادلى عصرده، برى گيزلى آلمان، اوچى آشكار دولتلرڭ، بشرڭ بو عصرده قرآنه شدّتِ إحتياجنى حسّ ايتمهسى و بِالفعل قبول ايتمهسى بيوك بر حادثۀِ قرآنيهدر. دگل اوچ دولت، بلكه يالڭز اون مشهور آدم، اون فيلسوف دخى (بردن) اوزاق مملكتلرده قرآنى تصديق ايتمهسى، بزلره و عالمِ إسلامه بيوك بر مژده و عوامِ أهلِ ايمانه بيوك بر قوّۀِ معنويه تأمين ايدر.
رسالۀِ نورڭ يگرمى طوقوزنجى مكتوبنده هجماتِ ستّه و ذيلى و إشاراتِ سبعه و تلويحاتِ تسعه گبى رسالهلرڭ رموزاتِ قرآنيه و توافقاتِ نوريهيه قاريشق بر صورتده بولونماسنڭ حكمتى، محكمهلر و أهلِ وقوفڭ صوصديريلماسنه و بزى اونلرله مسئول ايتمهمسنه بر وسيله اولمقدى. گويا او رموزات، او درين اينجه مسئلهلر، لسانِ حال ايله اونلره ديمش: «إنصاف ايديڭز، قرآنڭ بو درجه أسرارينه چاليشانلره ايليشمهيڭز!» شيمدى ايسه او قاريشق وضعيتى هيچ مناسب دگل.