شاملى، سليمان، بحرى گبى قيمتدار قارداشلريمزه بنم طرفمدن چوق سلام ايدييورم.
ثانيًا: كوچك علىنڭ بيوك قارداشى مبارك مصطفىنڭ عبد الرحمٰندن إرثيت آلديغى وظيفهسنى، قهرمان قارداشى و مبارك مخدومى او وظيفهيى تماميله گورويورلر. اونڭ وظيفهسى و خدمتى دوام ايدييور، مراق ايتمهسين. حافظ مصطفى، الحقّ مرحوم حافظ علىنڭ زماننده اونڭله برابر أكدكلرى نورانى تخملرڭ چوق مبارك محصولاتى وار. هم حافظ علىنڭ (رح) وفاتندن صوڭره حپسده اونڭ يرنده بڭا خدمتى، هر وقت اونى، بنم خاطريمه گتيرييور. مرحوم لطفينڭ أهمّيتلى وارثلرندن عبد اللّٰه چاوش، قهرمان طاهرى ايله آتابگى نورس قريهم حكمنه گتيرمشلر. إسلامكويلى عبد اللّٰه، حافظ على (رح) زماننده رسالۀِ نوره چوق خدمت ايتمش. اونلره عمومًا سلام ايدييورم. مبارك طاهرينڭ كوچوجك بر مدرسۀِ نوريه حكمنده خانهسندهكى مباركلره دعا ايدييورم. يڭى بر حافظ على نمونهسنى گوسترن و ميلاسلى خليل إبراهيمڭ صداقتنى آڭديران إسلامكويلى خليل إبراهيم و اوراده اوڭا بڭزهين قارداشلريمه ده پك چوق سلام. و بِالخاصّه إسپارطهده قهرمان رشدينڭ قهرمان قارداشى برهان بزى چوق منّتدار ايتديگنى و آز بر ايشله بزه و رسالۀِ نوره پك چوق ايش گورديگنى سويلهيڭز. ذاتًا سڭا شفاهًا سويلهمشدم، اونوتما، خصوصى ذكائىيى ده گور و دى كه: «جنابِ حقّه شكر ايدييورم. ينه ذكائى نامنده و صورتنده برادرزادهم عبد الرحمٰنى ينه بڭا ويردى.» داها شفاهًا سويلهدكلريمى سن بيليرسڭ، سن بنم مكتوبمسڭ.
* * *