عزيز، صدّيق قارداشلرم!
سزڭ بو دفعه نشئهلى گوزل مكتوبلريڭز، رسالۀِ نورڭ سربستيتى و مطبعه قپوسيله إنتشارى حقّنده بنى چوق مسرور أيلدى. و قهرمان طاهرينڭ ينه بو أهمّيتلى ايشده چاليشماسى ايچون بورايه گلمهسى، بنى شدّتله دنيايه باقمغه سَوق ايتدى. قلبًا ديدم: مادام قارداشلرم بو درجه ايستهيورلر، چارهسنى آرايهجغز. گيجهده قلبمه گلدى كه: ايكى أهمّيتلى سببدن، عنايتِ إلٰهيه تام سربستيت و أسكى حرفلرله تمامنى طبع ايتمك تام مساعده ايتمييور:
برنجى سبب:
إمامِ علىنڭ (رض) إشارت ايتديگى گبى، پرده آلتنده هر مشتاق، كندى قلمى ايله وياخود باشقه قلمى چاليشديرماسيله بيوك بر عبادت و آخرتده شهيدلرڭ قانيله راجحانه موازنه ايديلن مركّب ايله مجاهده حكمندهكى كتابتله أنوارِ ايمانى نشر ايتمكدر. أگر طبع ايديلسه، هركس قولايجه ألده ايتديگى ايچون، كمالِ مراقله اوڭا چاليشهمز، بِالفعل نشرينه خدمت وظيفهسنى غائب ايدر.
ايكنجى سبب:
رسالۀِ نورڭ مهمّ بر وظيفهسى، عالمِ إسلامڭ أكثريتِ مطلقهسنڭ يازيسى و خطّى اولان حروفِ عربيهيى محافظه ايتمك اولديغندن، طبع يوليله ايشه گيريشلسه؛ شيمدى أكثر خلق يالڭز يڭى حروفى بيلدكلرى ايچون، أڭ چوق رسالهلرى يڭى حروفله طبع ايتمك لازم گلهجك. بو ايسه رسالۀِ نورڭ يڭى حروفه بر فتواسى اولوب، شاكردلرى ده او قولاى يازىيى ترجيح ايتمگه سبب اولور. اونڭ ايچون شيمدىيه قدر پك چوق مستحق و لايق ايكن، رسالۀِ نوره سربستيت ويريلمهمشدى. لِلّٰهِ الحمد شيمدى حقيقتلرينڭ قوّتيله سربستيتى