عزيز، صدّيق قارداشلرم!
أوّلا:
سزلرى، برنجى وظيفۀِ نوريهيى، عصاىِ موسىيه عائد خدمته باشلاماڭزى تبريك و إسپارطهڭزى ديانتده و آدابِ إسلاميهده گرى دگل، ايلرى گيتمهسنى روح جانمزله تحسين و تبريك ايدييورز.
ثانيًا:
دڭزلينڭ خسروى حسن فيضىنڭ رسالۀِ نور حقّنده و رسالۀِ نورڭ أصلى و أساسى و معدنى اولان حقيقتِ قرآنيه و سرِّ ايمان و نورِ أحمدى تعريفنده يازديغى منظوم فقرهسى، ايچنده تام بر صميميت و متين بر قناعتِ ايمانيه بولونديغندن؛ هم هر شيئى چابوق قبول ايتمهين و دليلسز تسليم اولميان عالم، خصوصًا معلّم اولديغى حالده رسالۀِ نورڭ حقّانيتنى هم كندى نامنه، هم أطرافندهكى رفقاسنڭ شخصِ معنويسى حسابنه بر درجه فوق العاده، خالصانه تعريف ايتمهسندن سكّۀِ تصديقِ غيبى آخرنده، لاحقهدن آلينان پارچهلرڭ صوڭنده يازيلماسنى، هم آيريجه لاحقهده ده قيد ايديلمهسنى و خليل إبراهيمڭ ده صوڭ رسالۀِ نور حقّندهكى توصيفنامهسنى دخى بونڭ گبى سكّۀِ تصديقِ غيبينڭ آرقهسنده يازيلماسنى مناسب گوردك و بوراده ده اويله ياپدق. چونكه بو قدر قوّتلى و صميمى بر قناعت، سكّۀِ غيبيدهكى ايمالر نوعنده حقّانيتنه بر ايما، بر أماره اولابيلير.
ثالثًا:
حسن فيضىنڭ مكتوبنده بحث ايتديگى بتون اورادهكى قارداشلريمزه پك چوق سلام، تبريك ايدييورز. حپسخانهلرى بر درسخانۀِ نوريه اولديغى گبى، إن شاء اللّٰه دڭزلى ولايتى ده بر نوع مدرسة الزهرا حكمنه گچهجك. و چوقلرڭ يوزينى آق ايدن و نورى ظلملردن قورتارمغه چاليشان و نورڭ شاكردلرينڭ هر