بريسنه اوڭا هديه ايديلن رسالهلردن زياده هديه ويرمش حكمنده معنًا بزلره هديهسى وار. بو نورڭ تبرّكى، عموم اوڭا منّتدار اولانلرڭ خاطرهلريدر. يوزر مِثلى مقابلى آلينمش بر خاطرۀِ عدالتدر.
رابعًا:
إشارتِ غيبيه ايله، آلتمش درتده رسالۀِ نور تأليفجه تمام اولور دييه خبرِ غيبيهيى ايكى حال تصديق ايدييور:
برنجيسى:
چوق مهمّ نقطهلر خاطره گلديگى حالده، رسالهيى تأليف جهتنه سوق ايديلمييورم.
ايكنجيسى:
رسالۀِ نورڭ حفظ و نشرينه و صحابت و حمايتنه چاليشمق ايچون حيات ايستردم. فقط حدسز شكر اولسون كه، بر بيچاره إختيار سعيد يرنده چوق گنج سعيدلر او وظيفهيى ياپييورلر. خصوصًا خسرولر، فيضيلر، أحمدلر، محمدلر، برادرزادهم گبى چوق عبد الرحمٰنلر و هكذا حافظ علىيى قبرنده مسرور مفرّح ايتدكلرى گبى، إن شاء اللّٰه قبرمده ده اويله مسرور ايدهجكلر.
عموم قارداشلريمه، معصوملره، اُمّيلر، همشيرهلر گبى هر طائفهنڭ هر بريسنه برر برر سلام و دعا ايدييورز. چاليشقانلرڭ ده رسالۀِ نورڭ بركتيله او يانغيندن زيانلرى يوقدر، سزلره عرضِ حرمت و سلام ايدوب أللريڭزدن اوپرلر.
* * *