ذاتڭزڭ شخصمه قارشى حدّمدن پك چوق زياده حسنِ ظنّڭزى، رسالۀِ نورڭ شخصِ معنويسى نامنه قبول ايدهبيليرم؛ يوقسه كنديمى او مقاملرده گورمك بنم حدّم دگل.
هم «رسالۀِ نور مسلگى طريقت دگل، حقيقتدر؛ صحابه مسلگنڭ بر جلوهسيدر. بو زمان، طريقت زمانى دگل، ايمانى قورتارمق زمانيدر.» رسالۀِ نور، بو خدمتى لِلّٰهِ الحمد أڭ مشكل و آغير زمانلرده ياپمش و ياپييور. رسالۀِ نور دائرهسى، حضرتِ على و حسن و حسينڭ (رض) و غوثِ أعظمڭ (قس) (إخباراتِ غيبيهلريله) شاكردلرينڭ بو زمانده بر دائرهسيدر. چونكه حضرتِ على (رض)، اوچ كرامتِ غيبيهسيله رسالۀِ نوردن خبر ويرديگى گبى؛ غوثِ أعظم (قس) ده قوّتلى بر صورتده رسالۀِ نوردن خبر ويروب ترجماننى تشجيع ايتمش. بو محرم درت رساله، كرامتِ عَلويه و غوثيهيه عائد درت رساله إن شاء اللّٰه بر وقت سزه گوندريلهبيلير. محكمه أهلِ وقوفى اونلره إعتراض ايدهمهمش، يالڭز «بو يازيلماملى ايدى» دييه كوچك بر تنقيد ايتمشلر. بن ده جواب ويردم، اونلر صوصديلر. ذاتًا اويسى بر صورتده طوغريدن طوغرىيه حقيقت درسمى غوثِ أعظمدن (قس) و زين العابدين (رض) و حسن حسين (رض) واسطهسيله إمامِ علىدن (رض) آلمشم. اونڭ ايچون، خدمت ايتديگمز دائره اونلرڭ دائرهسيدر.
* * *
جنابِ حقّه حدسز شكر اولسون كه؛ دعاڭزڭ همّتيله، اون بش گوندن زياده شدّتلى بر حرارت ايچنده تهلكهلى و زهرلى خستهلغڭ، ايكى گوندر تهلكهسى گچدى. خستهلقله بر ساعت عبادت بر گون قدر اولماسى جهتيله، إن شاء اللّٰه ياپامديغم چوق خيراتڭ يرينى بو خستهلق طولديرمش و چوق قصوراتمه ده كفّارت اولمش. فقط ضعفيت و خستهلق دوام ايدييور.