گلديگنى معناىِ إشارى ايله إخطار ايدييور. مسموعاته گوره؛ بوگونكى آمريقا، أقطارِ عالمه تدقيقات ايچون گوندرديگى درت هيئتدن بريسنى، بوگونكى بشريتڭ سعادتنى تأمين ايدهجك سالم بر دين تحرّيسنه مأمور ايتمشدر. بو ايسه، مجدّدلگنى محكمه لسانيله هر طرفه إعلان ايدن رسالۀِ نور، بو مضطرب، پريشان بشريتڭ أڭ بيوك بر سعادتى اولاجغنه ايمانمز پك قوّتليدر.
سَوْگيلى استاديمز باشمزده و أڭ عالى حقيقتلرى طاشييان و قرآنڭ أڭ يوكسك و مبارك تفسيرى بولونان رسالۀِ نور ألمزده اولدقجه، سَوينجلريمز حدّ و حدوده آلينماز.
ايشته بو حقيقتلرڭ هر بر جزئى، ساحۀِ فعاليته چيقسه، هر طرفده مراقله، ذوقله كندينى اوقوتديرييور. بوڭا بارز دليللر پك چوق وار. خصوصيله، إنكارِ حشر مفكورهسنى مغلوب ايدن اوننجى سوز مطبوع نسخهلرى؛ و بِالخاصّه گيزلى طبع ايديلديگى حالده كندينى سربست اوقوتان و تقويۀِ ايمانده پك يوكسك خارقهلرى طاشييان آيت الكبرى رسالهلرى؛ و إنكارِ الوهيت مفكورهسنى زير و زبر ايدن كلّياتِ نور حجّة البالغه و ميوه گبى أجزالرى ميدانده... إن شاء اللّٰه قرآنڭ أطرافنه چويريلمك ايستهنيلن ايمانسزلغڭ أمانسز سورينى، رسالۀِ نور تملندن قالديرهجق، ايمانسزلغڭ أمانسز آتشنى سوندوروب، آبِ حيات بخش ايدن شرابِ كوثرينى، بتون دنيايه أمانلى ايمان ويرمكله ايچيرهجكدر.
اَلْبَاقِى هُوَ الْبَاقِى
چوق قصورلى طلبهڭز
خسرو
* * *