وفاتدن صوڭره اونلرڭ مزارستاننده دفن اولمامى آرزولادم. بردن إخطار ايديلدى كه: «گرچه مدرسة الزهرانڭ مركزى اولان إسپارطه ولايتنده مادّةً بولونمق چوق جهتله فائدهلى، سعادتليدر؛ فقط نورڭ مسلگى و نورجيلرڭ مشربى جهتيله دائما برابرسڭز. زمان و مكان، پرده اولامازلر. شرقده، غربده، شمالده، جنوبده، دنياده، برزخده بولونسهڭز، معنًا بر مجلسده برابر صاييليرسڭز. اونلرڭ معنوى يارديملرى دائما بربرينه اولويور و سڭا ده گلير.» دييه بنى تسكين ايتدى.
بن ديدم: مادام شيمدى هر طرفده نورلره قوّتلى و كثرتلى أللر صاحب چيقييورلر و تام محافظه و نشرينه چاليشييورلر، ألبته بن بر پارچه إستراحت ايتسهم تنبللك اولماز.
* * *
عزيز، صدّيق قارداشلرم!
أوّلا: گچن مبارك ليلۀِ برائتڭزى و گلهجك رمضانِ شريفڭزى تبريك ايدرز. بو سنه برائت گيجهسى، نورجيلر حقّنده چوق بركتلى و كرامتلى اولديغنه بر أمارهسنى حيرتله گوردك. شويله كه:
بن برائت گيجهسندن آز أوّل عصاىِ موسى تصحيحيله مشغول ايكن؛ بر گوگرجين پنجرهيه گلدى، بڭا باقدى. بن ديدم: «مژده مى گتيردڭ؟» ايچرىيه گيردى، گويا أسكيدن دوست ايدك گبى هيچ اوركمهدى. عصاىِ موسى (حاشيه) اوستنه چيقدى، اوچ ساعت اوطوردى؛ أكمك، پرنج ويردم، ييمهدى؛ تا آقشامه قالدى، صوڭره گيتدى، تكرار گلدى. برائت گيجهسنده، تا صباحه قدر
___
(حاشيه): أوت، بز گوزيمزله گوردك.
أوت أوت أوت
نور الدين محمد إسماعيل