جنابِ حقّه حدسز شكر ايدييورز كه؛ مدرسة الزهرانڭ أركانلرى، حقيقى بر تساند و صارصيلماز بر إتّحاد كرامتيله، بتون مشكلاته و مانعهلره غلبه ايدوب نورڭ ألماس ذوالفقارلرينى و خارقه معجزاتلى حجّتلرينى محتاجلره يتيشديرمگه موفّق اولويورلر. بو نتيجهيه مقابل چكديگمز زحمت بيڭ درجه زياده اولسه ده اوجوزدر، أهمّيتى يوقدر.
قارداشمز رأفتڭ مكتوبنده منوّره، نظميه، صائم نامنده اوچ معصومڭ اوچ آيده ألفدن باشلايوب قرآنِ حكيمى ختم ايتمگه موفّق اولمالرندن و قرآن درسيله برابر نور حقيقتلرينى و حقائقِ ايمانيهيى معصومانه، مشتاقانه ديڭلهمهلرى ايچون اونلرى و استادلرينى و پدر و والدهلرينى تبريك ايدييورز. منوّره و نظميه، عبد الباقى و محمد جلالڭ نور خدمتنده نقصان قالان وظيفهلرينى إن شاء اللّٰه تكميل ايدهجكلر.
بزى و رسالۀِ نورى چوق منّتدار ايدن قهرمان برهانڭ مكتوبنده يازيلان خستهيه جنابِ حق شفا ويرسين و قارداشمز ذكائينڭ وفات ايدن والدهسنه چوق رحمت أيلهسين، آمين.
نورڭ أركانندن و خواجهلر قسمنڭ يوزينى آق ايدن نورڭ سانترالى صبرينڭ مكتوبنده، مرحوم حافظ على، حسن فيضى و اونلرڭ خَلَفى و وظيفهلرينى گورن أحمد فؤادڭ، إختيار و وظيفهسى بيتمك اوزره اولان بو بيچاره استادلرينه بدل عمرينى فدا ايتمك، اونڭ يرنده چابوق برزخه گيتمك گبى؛ صبرى قارداشمز ده دردنجى اولمق اوزره و عمرينى قابلسه بڭا ويرمك، نفس و قلبنى إقناع ايدوب بڭا يازييور. بن، بو پك أسكى و صارصيلماز و نورلر ايچون حياتى چوق فائدهلى قارداشمه بيڭلر بارك اللّٰه دييوب، بڭا ويرديگى عمرينى قبول ايدوب، (اوڭا عينًا أحمد فؤاد گبى) او باقى قالان ايكى عمريمى، او ايكى قارداشمه و او ايكى يڭى سعيده أمانت ويروب بنم بدلمه خدمتِ ايمانيهده و نوريهده خدمت ايتسينلر.