«سن، بر مكتوبڭده، شاعرانه بر لطيفهيى (يعنى قوشلرڭ، مكتوبلريڭى يازمق و اوقومق زماننده يانڭزه و شاكردلرڭ ياننه گلمهلرينى او لطيفهيى) جدّى بر طرزده قارداشلريڭه يازدڭ. حالبوكه او قوشلر، حالِ عالمى و رسالۀِ نورڭ حادثاته قارشى فائدهسنى بيلهجك ماهيتندن اوزاقدرلر؟»
الجواب:
أمر و إذنِ إلٰهى و حول و قوّتِ ربّانيه ايله، عموم حيواناتڭ ملائكهدن بر چوبانى، بر ناظرى اولديغى گبى؛ قوش طائفهسنڭ ده بر چوبانى وار. اونلر بيلمسه ده، أمرِ إلٰهى ايله و إلهامِ ربّانى ايله چوبانلرى اونلرى سَوق ايدر. او سَوقِ فطرى ايسه، قوشلره گلن إلهامه طايانير. قوشلر، إلهامه مظهردرلر كه؛ ياشى بر گونلك بر آرى ياوروسى، هواده بر گون مسافهده گيدر؛ او إلهامِ فطرى ايله، او سَوقِ ربّانى ايله يولنى شاشيرمادن دونوب، گلوب يوواسنه گيرر.
أوت ناصلكه كُرۀِ أرض، رسالۀِ نور و شاكردلرينه گلن ظلمه إعتراض ايتدى و جوِّ هوا ياغمورسزلقله و صوغوقله رسالۀِ نوره گلن تضييقات و مصادرهيى تنقيد ايتدى و بلوطلر سربستيتنى ياغمورلرله آلقيشلادى؛ ألبته قوش نوعى ده علاقهدار اولابيلير.
أوت إنسانڭ بر قسم صنعى قوشلرينڭ بر بومبا يمورطهسى ايله بر كويى خراب ايدوب بيڭ آدمى محو ايدن جنايتنه و جهنّمى زقّوم يمورطهلرى طاشييان او إنسانى قوشلرڭ تخريبجى قسمنى؛ هم كُرۀِ أرضه، هم نوعِ بشره مستبدانه، مرحمتسز تخريباتنه قارشى، بو حيوانى قوشلر، تأثيرلى بر صورتده إستقبالى تنوير ايدن رسالۀِ نورى ألبته معنًا تبريك ايدوب آلقيشلار، دييه صورتندهكى حادثه، گرچه چوق طاتلى بر لطيفهدر، فقط چوق اينجه بر حقيقت دخى ايچنده وار.
* * *