قارداشلرم!
بو دفعه ميوه رسالهسنڭ تام قيمتنى بيلن و كندينه ميوهجى نامنى ويرن رسالۀِ نور صانترالجيسنڭ يازديغى مكتوب، بنى چوق ممنون أيلدى. چونكه خلوصى، حقّى گبى يگرمى سنهيه ياقين بر زماندن بَرى مابيْنلرنده اولان صميمانه دوستلق و قارداشلق تام دوام و ثبات ايتديگى گبى؛ اونلرڭ رسالۀِ نوره قارشى علاقه و إرتباط و صداقتلرى، عينًا مابيْنلرندهكى خالصانه مناسبتلرى گبى هم دوام ايدييور، هم متانت كسب ايدييور، عارضهلرله صارصيلمييور. جنابِ حقّه شكر ايدييورم كه؛ بويله خالص، مخلص و باشقهلره حسنِ مثال اولان صادق شاكردلرى رسالۀِ نوره ويرمش كه، دائمى حقده خلوص ايله و نور خدمتنده صبر ايچنده شكر ايدييورلر. او ميوهجينڭ جوارنده إسمنى سويلهمديگم معلوم و چوق علاقهدار اولديغم قارداشلرم، خصوصًا بارلا صدّيقلرى، بنى چوق دفعه خيالاً أسكى زمانه و او مملكته جلب ايدييورلر. بارلا و طاغلرنده گزديرييورلر. بن اونلرله و او يرلريله چوق علاقهدارم، اونوتمييورم. اونلره بيڭلر سلام ايدييورم.
قوزجه خطيبى حسن شكرينڭ مكتوبى بنى ممنون أيلدى؛ سلام ايدرم. معصوملر، اُمّيلر، همشيرهلر و قلمله چاليشانلر باشده اولارق عموم قارداشلريمه برر برر سلام و دعا ايدييورز.
اَلْبَاقِى هُوَ الْبَاقِى
قارداشڭز
سعيد النورسى
* * *