ثانيًا: بو قهرمان قارداشمزڭ، حياتده قالديغى گبى، دفترِ حسناتنه هر بريمز، معنوى قزانجلريمزى (عمومده اولديغى گبى، خصوصى بر صورتده دخى) او قارداشمزه هديه ايتملىيز. بن كندم اونى ده، حافظ على، حافظ محمد و صاوهلى أحمد و محمد زهدينڭ بشنجيسى اولارق أولياءِ عظيمهنڭ خاص دائرهسنده معنوى قزانجلريمى اوڭا ده باغيشلاميه قرار ويردم. او ذاتڭ آغير شرائط آلتنده نورلرڭ إنتشارينه بيوك خدمتلر ايدن نور حقّندهكى فقرهلرى، لاحقهده اولديغى گبى، مناسب گورديگڭز بعض مجموعهلرڭ آخرينه ده او تأثيرلى مكتوبلرينڭ برر دانهسنى إلحاق ايديڭز. ناصلكه عصاىِ موسى و ذو الفقارده يازيلييور؛ تا اونڭ او جانلى فقرهلرى، اونڭ بدلنه نورلره خدمت ايتسين.
هم بنم بدلمه اونڭ كوچوجك مدرسۀِ نوريهسى اولان خانهسندهكى أقرباسنه و دڭزلى و جوارندهكى بيوك مدرسۀِ نوريهدهكى رفيقلرينه و طلبهلرينه و نور شاكردلرينه تعزيهمزى تبليغ ايدوب دييڭز كه: بن، بتون عمرمده، بو درجه، بر وفاتدن بو قدر متأثّر اولوب آغلامامشدم.
هم سزه بوندن أوّل يازديغم مكتوبدهكى شدّتلى حدّتم و دماغمدهكى پريشانيت، شيمدى تحقّق ايتدى كه، او قهرمان قارداشمزڭ وفاتى گونندن باشلامش. حتّى او تأثير، إختياريمى سلب ايتمشدى. ئولهجگم دييه خدمتجىيه وصيتمى سويلهدم. ديمك ايكنجى بر روحم حكمنده، حسن فيضى بنم بدلمه ئولمش و ئولويور. حتّى اونڭ وفات مكتوبى، بتون بتون عادتمه مخالف بر بچق ساعت أليمده ايكن آچامييوردم. هر نه ايسه... بتون بو أليم آجيلره مقابل، عنايتِ إلٰهيه إمداده گلدى؛ هم كنديمى، هم اونى، هم نورجيلرى مسرورانه روح و جانمزله تعزيه ايچنده تبريك ايتدم. بيڭ بارك اللّٰه و بيڭلر رحمة اللّٰه ديدم، ترخيصنى آلقيشلادم.