طاهريلر، مصطفىلر، نظيفلر، عثمانلر، عبد الرحمٰنلر، عليلر، صبريلر، فيضيلر، أحمدلر، محمدلر، عاطفلر، مصطفىلر، صادقلر، عثمانلر و هكذا نورلرڭ بهادرلرى دنياده آرقهمده قالدقلرى، ئولومى بڭا چوق خفيفلشديرييورلر. يالڭز گناه جهتنده ئولويورم، حسنات جهتنده ياشايورم دييه اللّٰهه حدسز شكر ايدييورم.
* * *
أوّلا: (لِكُلِّ مُصٖيبَةٍ اِنَّا لِلّٰهِ وَاِنَّٓا اِلَيْهِ رَاجِعُونَ) رسالۀِ نورڭ قهرمانلرندن و حافظ علىنڭ مقامنه گچن مرحوم حسن فيضىنڭ وفاتى، دڭزلىيه، رسالۀِ نور دائرهسنه و بو مملكته و عالمِ إسلامه بيوك بر ضايعاتدر. فقط كنديسى، پك صميمى و خالص و فوق العاده بياناتيله و درسلريله، إن شاء اللّٰه كندى يرنده چوق حسن فيضيلرڭ يتيشمهسنه بر زمين إحضار ايتمش، صوڭره گيتمش. عينًا برادرزادهم عبد الرحمٰن گبى، بر ايكى سنهده اون سنه قدر نورلره قيمتلى خدمت ايتدى. گويا او ده، عبد الرحمٰن ده چابوق دنيادن گيدهجگز دييه اون سنهلك وظيفهيى بر ايكى سنهده گورديلر. بن، مرحوم حسن فيضىنڭ وفاتنى اونڭ شخصى إعتباريله تبريك ايدييورم و دڭزلىيى و نور دائرهسنى و بو مملكتى جدًّا تعزيه ايدييورم. بو چشيد ذو الجناحيْن و حقيقى مؤمن و مدقّق بر عالم و يوكسك بر أديب معلّم و تأثيرلى بر واعظ و مدرّسى غائب ايتديگى ايچون، بيوك بر مصيبتدر. جنابِ حق، إن شاء اللّٰه دڭزلى گبى قهرمانلر اوجاغندن چوق حسن فيضى روحنده نورلره صاحب و ناشر چيقارهجق. بر دانه طوپراق آلتنه گيرر، وفات ايدر؛ فقط يوز دانه سنبلنده ميدانه گلديگى گبى؛ رحمتِ إلٰهيهدن اميدوارز كه، حسن فيضى ده اويله قدسى بر سنبل ويرهجك. چوق حسن فيضيلر نور دائرهسنده يتيشهجكلر، وظيفهسنى داها زياده ياپاجقلر.