طولو بولونان جمعًا بش صندوق كتاب، طرفمزدن آچيلارق اوقوندى (حاشيه).
سعيد النورسى طرفندن تأليف ايديلن باصيلمش، باصيلمامش رسالۀِ نور أجزالرى و رسالۀِ نوره أكلى سعيد النورسى ايله بعض شاكردلرى طرفندن يازيلمش قسمًا علمى و دينى مكتوبلرله، شاكردلرڭ بربريله و سعيد النورسى ايله عادى مخابره مكتوبلرى و قيليشهلر، اينجهلهمه موضوعى صلاحيتمز داخلنده گورولهرك اينجهلندى. بونلرڭ ماهيتنى بليرتمك ايچون بو رساله و مكتوبلرى ايكى نوعه آييرمق گركدر:
رسالهلر: بر آيتڭ تفسيرى و بر حديثڭ شرحى مقصديله يازيلمش اولانلرى ايله؛ دين، ايمان، اللّٰه، پيغمبر، قرآن و آخرت عقيدهلرينى و عبارهلرينى آچيقجه آڭلاتمق ايچون تمثيللرله يازيلمش علمى گوروشلرى و إختيارلرله گنجلره خطاب ايدن أخلاقى اوگوتلر و قسمًا حيات تجربهسندن آلينمش عبرتلى وقعهلر و أصنافه عائد فائدهلى منقبهلرى إحتوا ايدن، موجودڭ يوزده طقساننى تشكيل ايدن رسالهلردر كه؛ (بونلرده) بتون بو رسالهلرده مؤلّف هم صميمى، هم حسبى و هم ده علم يولندن و دينى أساسلردن هيچ آيريلمامشدر. بونلرده دينى آلَت ايتمك و جمعيت تشكيل ايتمكله أمنيتى إخلال حركتنڭ بولونمديغى صريحدر. شاكردلرڭ بربريله و سعيد النورسى ايله عادى مخابره مكتوبلرى ده بو نوعدندرلر.
___
(حاشيه): أهلِ وقوف راپورندهكى تنقيد قسمى، محكمهده قطعى جوابلرى ويريلديگندن و مدافعاتمڭ آخرنده يازيلديغندن، بوراده يازيلمادى. ذاتًا او تنقيدلر، اوچ درت رسالهده يالڭز اون جزئى مسئلهدر. هم سياسى دگل، علميدرلر. هم او إعتراضلر، سهو و خطا اولديغى، سندلرله محكمهده إثبات ايديلمشدر.