قونوشان يالڭز حقيقتدر
رسالۀِ نورده إثبات ايديلمشدر كه: بعضًا ظلم ايچنده عدالت تجلّى ايدر. يعنى إنسان بر سببله بر حقسزلغه، بر ظلمه معروض قالير؛ باشنه بر فلاكت گلير؛ حپسه ده محكوم اولور؛ زندانه ده آتيلير. بو سبب حقسز اولور، بو حكم بر ظلم اولور. فقط بو واقعه عدالتڭ تجلّيسنه بر وسيله اولور. قدرِ إلٰهى باشقه بر سببدن طولايى جزايه محكوميته إستحقاق كسب ايتمش اولان او كيمسهيى بو دفعه بر ظالم أليله جزايه چارپديرر، فلاكته دوشورور. بو عدالتِ إلٰهينڭ بر نوع تجلّيسيدر.
بن شيمدى دوشونويورم. يگرمى سكز سنهدر ولايت ولايت، قصبه قصبه طولاشديريلييورم. محكمهدن محكمهيه سَوق ايديلييورم. بو ظالمانه إشكنجهلرى ياپانلرڭ بڭا عطف ايتدكلرى صوچ نهدر؟ دينى سياسته آلَت ياپمق مى؟ فقط بونى نه ايچون تحقّق ايتديرهمييورلر. چونكه حقيقتِ حالده بويله بر شى يوقدر. بر محكمه آيلرجه، سنهلرجه صوچ بولوب ده بنى محكوم ايتمگه اوغراشييور. او بيراقييور؛ ديگر بر محكمه عين مسئلهدن طولايى بنى تكرار محاكمه آلتنه آلييور. بر مدّت ده او اوغراشييور؛ بنى تضييق ايدييور؛ درلو درلو إشكنجهلره معروض قيلييور. او ده نتيجه ألده ايدهمييور، بيراقييور. بو دفعه بر اوچنجيسى ياقامه ياپيشييور. بويلهجه مصيبتدن مصيبته، فلاكتدن فلاكته سوروكلهنوب گيدييورم. يگرمى سكز سنه عمرم بويله گچدى. بڭا إسناد ايتدكلرى صوچڭ أصلى و أساسى اولماديغنى نهايت كنديلرى ده آڭلاديلر.
اونلر بو إتهامى قصدًا مى ياپديلر، يوقسه بر وهمه مى قاپيلديلر؟ ايستر قصد اولسون، ايستر وهم اولسون؛ بن بويله بر صوچله مناسبت و علاقهم اولماديغنى كمالِ قطعيتله يقينًا و وجدانًا بيلييورم يا. دينى سياسته آلَت ايدهجك بر آدم اولماديغمى بتون إنصاف دنياسى ده بيلييور. حتّى بنى بو صوچله إتهام ايدنلر ده بيلييورلر يا. او حالده نهدن بڭا بو ظلمى ياپمقده إصرار ايدوب طورديلر؟ نهدن بن صوچسز و معصوم اولديغم حالده بويله دواملى بر ظلمه، معنّد بر إشكنجهيه معروض قالدم؟ نهدن بو مصيبتلردن قورتولامدم؟ بو أحوال عدالتِ إلٰهيهيه مخالف دوشمز مى؟
بر چاريك عصردر بو سؤاللرڭ جوابلرينى بولامييوردم. بڭا ظلم و إشكنجه ياپدقلرينڭ حقيقى سببنى شيمدى آڭلادم. بن كمالِ تأثّرله سويلهيورم كه، بنم صوچم: خدمتِ قرآنيهمى مادّى و معنوى ترقّياتمه، كمالاتمه آلَت ياپمقمش.
شيمدى بونى آڭلايورم، حسّ ايدييورم، اللّٰهه بيڭلرله شكر ايدييورم كه:
اوزون سنهلر إختيارم خارجنده اولارق خدمتِ ايمانيهمى مادّى و معنوى كمالات و ترقّياتمه و عذابدن و جهنّمدن قورتولمامه و حتّى سعادتِ أبديهمه وسيله ياپمقلغمه، ياخود هر هانگى بر مقصده آلَت ياپمقلغمه معنوى غايت قوّتلى مانعهلر بنى منع ايدييوردى. بو درونى حسلر و إلهاملر بنى حيرتلر ايچنده بيراقييوردى. هركسڭ خوشلانديغى معنوى مقاماتى و اُخروى سعادتلرى، أعمالِ صالحه ايله قزانمق و بو يوله متوجّه اولمق هم مشروع حقّى اولديغى، هم ده هيچ كيمسهيه هيچ بر ضررى بولونمديغى حالده بن روحًا و قلبًا منع ايديلييوردم. رضاءِ إلٰهيدن باشقه فطرى وظيفۀِ علميهنڭ سَوقيله، يالڭز و يالڭز ايمانه خدمت خصوصى بڭا گوستريلدى.
چونكه شيمدى بو زمانده هيچ بر شيئه آلَت و تابع اولميان و هر غايهنڭ فوقنده اولان حقائقِ ايمانيهيى فطرى عبوديتله، بيلمهينلره و بيلمك إحتياجنده اولانلره تأثيرلى بر صورتده بيلديرمك؛ بو كشماكش دنياسنده، ايمانى قورتارهجق و معنّدلره قطعى قناعت ويرهجك بر طرزده؛ يعنى هيچ بر شيئه آلَت اولميهجق بر طرزده، بر قرآن درسى ويرمك لازمدر كه؛ كفرِ مطلقى و متمرّد و عنادجى ضلالتى قيرسين، هركسه قطعى قناعت ويرهبيلسين. بو قناعت ده بو زمانده، بو شرائط داخلنده، دينڭ هيچ بر شخصى، اُخروى و دنيوى، مادّى و معنوى بر شيئه آلَت ايديلمديگنى بيلمكله حصوله گلهبيلير. يوقسه قوميتهجيلك و جمعيتجيلكدن تولّد ايدن دهشتلى دينسزلك شخصيتِ معنويهسنه قارشى چيقان بر شخص أڭ بيوك معنوى بر مرتبهده بولونسه، ينه وسوسهلرى بتون بتون إزاله ايدهمز. چونكه ايمانه گيرمك ايستهين معنّدڭ نفسى و أناسى دييهبيلير كه: «او شخص دهاسيله، خارقه مقاميله بزى قانديردى.» بويله دير و ايچنده شبههسى قالير.
اللّٰهه بيڭلرجه شكرلر اولسون كه، يگرمى سكز سنهدر دينى سياسته آلَت إتهامى آلتنده، قدرِ إلٰهى إختيارم خارجنده، دينى هيچ بر شخصى شيئه آلَت ايتمهمك ايچون بشرڭ ظالمانه أليله محضِ عدالت اولارق بنى طوقاتلايور، ايقاظ ايدييور. صاقين! دييور، ايمان حقيقتنى كندى شخصڭه آلَت ياپمه؛ تا كه، ايمانه محتاج اولانلر آڭلاسينلر كه، يالڭز حقيقت قونوشويور. نفسڭ أوهامى، شيطانڭ دسيسهلرى قالماسين، صوصسون!
ايشته نور رسالهلرينڭ بيوك دڭزلرڭ بيوك طالغهلرى گبى گوڭللر اوزرنده حصوله گتيرديگى هيجانڭ، قلبلرده و روحلرده ياپديغى تأثيرڭ سرّى بودر؛ باشقه بر شى دگلدر. رسالۀِ نورڭ بحث ايتديگى حقيقتلرڭ عيننى بيڭلرجه عالملر، يوز بيڭلرجه كتابلر داها بليغانه نشر ايتدكلرى حالده ينه كفرِ مطلقى طورديرهمييورلر. كفرِ مطلقله مجادلهده بو قدر آغير شرائط آلتنده رسالۀِ نور بر درجه موفّق اولويورسه، بونڭ سرّى ايشته بودر: سعيد يوقدر، سعيدڭ قدرت و أهليتى ده يوقدر. قونوشان يالڭز حقيقتدر، حقيقتِ ايمانيهدر.
مادام كه، نورِ حقيقت، ايمانه محتاج گوڭللرده تأثيرينى ياپييور؛ بر سعيد دگل، بيڭ سعيد فدا اولسون. يگرمى سكز سنه چكديگم أذا و جفالر و معروض قالديغم إشكنجهلر و قاتلانديغم مصيبتلر هپ حلال اولسون. بڭا ظلم ايدنلره، بنى قصبه قصبه طولاشديرانلره، حقارت ايدنلره، درلو درلو إتهاملرله محكوم ايتمك ايستهينلره، زندانلرده بڭا ير حاضرلايانلره حقّمى حلال ايتدم.
عادل قدره ده ديرم كه: بن سنڭ بو شفقتلى طوقاتلريڭه مستحق ايدم. يوقسه هركس گبى غايت مشروع و ضررسز اولان بر يول طوتهرق شخصمى دوشونسه ايدم، مادّى معنوى فيوضات حسلريمى فدا ايتمهسه ايدم، ايمان خدمتنده بو بيوك معنوى قدرتى غائب ايدهجكدم.
بن مادّى و معنوى هر شيئمى فدا ايتدم، هر مصيبته قاتلاندم، هر إشكنجهيه صبر ايتدم. بو سايهده حقيقتِ ايمانيه هر طرفه ياييلدى. بو سايهده نور مكتبِ عرفاننڭ يوز بيڭلرجه، بلكه ده ميليونلرجه طلبهلرى يتيشدى. آرتيق بو يولده، خدمتِ ايمانيهده اونلر دوام ايدهجكلردر و بنم مادّى و معنوى هر شيدن فراغت مسلگمدن آيريلميهجقلردر. يالڭز و يالڭز اللّٰه رضاسى ايچون چاليشهجقلردر.
بزه إشكنجه ايدنلر بيلميهرك، قدرِ إلٰهينڭ سرلرينه، درين تجلّيلرينه عقل ايرديرهميهرك بزم دعوامزه، حقيقتِ ايمانيهنڭ إنكشافنه خدمت ايتديلر. بزم وظيفهمز اونلر ايچون يالڭز هدايت تمنّيسندن عبارتدر.
بن چوق خستهيم. نه يازمغه، نه سويلهمگه طاقتم قالمادى. بلكه ده بونلر صوڭ سوزلرم اولور. مدرسة الزهرانڭ رسالۀِ نور طلبهلرى بو وصيتمى اونوتماسينلر.
سعيد النورسى
(أميرطاغ ل. ٢، سه. ٧٨)
* * *
(اون نور طلبهسنڭ ايكى آيلق بر موقوفيتدن صوڭره آنقره برنجى آغير جزا محكمهسنده (أس. ٩٥٨/١٤٥، قا. ٩٥٨/١٤١) صاييلى برائت قرارى ايله نتيجهلهنن و تمييزڭ (أس. ٣٥٨٣، قا. ٥٣٦٦) صاييلى تصديقى ايله كسينلشهڭ تكذيب مكتوبنڭ صورتى.)
بعض غزتهلرڭ، نور طلبهلرى حقّندهكى أصلسز نشرياتلرينه جوابدر
بعض مخالف غزتهلرڭ، رسالۀِ نور طلبهلرينه تكرار «طريقت قورمشلر» إتهامنى ياپدقلرينى گوردك. بونڭ حقيقتله هيچ بر علاقهسى يوقدر. بو خصوص رسالۀِ نور دعواسنى گورن بر چوق آغير جزا محكمهسنڭ قطعيت كسب ايتمش قرارلريله ثابتدر. هم طريقته دائر أڭ كوچك بر أمارهيه، وقتيله مصادره ايديلوب صوڭره بِلا قيد و شرط صاحبلرينه إعاده ايديلن رسالۀِ نور كتابلرى و مكتوبلرى آراسنده تصادف ايديلمهمشدر. بِالعكس استاديمز سعيد النورسىنڭ مكتوبلرنده و مدافعهتنده قطعى بر لسانله بيان ايتديگى: «زمان طريقت زمانى دگل، ايمانى قورتارمق زمانيدر. طريقتسز جنّته گيدن پك چوق، فقط ايمانسز جنّته گيرن يوقدر.» إفادهسى موجوددر.
بو صراحته رغمًا و بوگونه قدر بتون محكمه و أهلِ وقوفلرڭ تدقيقلرى نتيجهسى، طريقت خصوصنده أڭ كوچك بر دليله تصادف ايدهممهلرى گوسترييور كه: دينى اورتهدن قالديرمق ايستهين و بوگونكى إسلامى إنكشافى بر درلو هضم ايدهمهين بر گروه، حقيقتِ إسلاميته طريقت نامنى ويروب كندى أفكارلرى لهنه بو وطنده بر زمين إحضار ايتمك پشندهدرلر. ألبته هر دفعهسنده اولديغى گبى، گيزلى دينسزلرڭ أنتريقهلرى ايله، پلانلرى ايله إحداث ايديلن بو واقعه، بو وطن و ملّتڭ لهنده اولارق تجلّى ايدهجك، آيدين و نازللى محكمهلرى ده عدالتلى سلفلرينه إتّباعًا نور شاكردلرينى تبرئه ايدهجكلردر.
رسالۀِ نورڭ بتون وطن سطحنده و حتّى عالمِ إسلام و آوروپانڭ پك چوق يرلرنده حسنِ قبوله مظهر اولماسى و توركلرى عالمِ إسلامله أسكى إتّحاده موفّق ايدهجك دنيوى بر ثمرهيى نور شاكردلرينڭ نيّتلرنده اولمادن نتيجه ويرمهسى و حكومتڭ بِالذّات إسلاميته، دينه و وجدان حرّيتنه تام قيمت ويروب و أسكى حكومتڭ تخريباتلرينى تعميره چاليشماسى و مقدّساته تجاوز ايدنلرڭ تنكيلى حقّنده بر قانون چيقارمغه تشبّثى گبى مثبت و فرحلاتيجى پك چوق حادثاتڭ عين آننده بو أصلسز مسئلهنڭ إحداثى، حكومتڭ و إسلاميتڭ عليهنده اولانلرڭ محصولى اولديغنده أصلا شبهه ايتمييورز.
يالانلرينڭ بر قاچ دليلى شونلردر:
استاديمز سعيد النورسى ايچون «بر پادشاه و بر شاه گبى ياشامقده و گلن يارديملرله گچينمكدهدر» دييه او وجدانسزلر آپآچيق بر إفتراده بولونمشلردر. سعيد النورسى، حياتنده كيمسهنڭ منّتى آلتنده قالميان، بش بيڭ ليرا هديهيه بش پاره دگر ويرمهدن ردّ و إعاده ايدن و حتّى چوجقلغنده عموجهسنڭ چورباسنى دخى ايچمهمش اولان و بتون حياتنده إستغنا دستورينى أڭ ظالمانه معاملهلر و محروميتلر ايچنده قالديغى زمانلر دخى بوزميان و بويلهجه عزّتِ إسلاميه و شرفِ دينيهيى محافظه ايتمش اولان بر ذاتدر.
أوت استاديمزڭ خلقلرڭ هديهسنى قبول ايتمهمك دستورى، سكسان سنهلك حياتى ايله ثابت اولديغى، بو اوتوز سنهدهكى متعدّد محكمهلرده دخى وثيقهلرله تحقّق ايتمش، دوست و دشمنڭ گوزلرى اوڭنده ظاهر اولمشدر. بو بديهى حقيقتڭ هركسجه بيلينديگى بر زمانده، بويله إتهاملرده بولونانلرڭ نه قدر دهشتلى غرضكار اولدقلرينى أهلِ وجدانڭ تقديرلرينه بيراقييورز...
آنقره حكومتنڭ عدالتيله استاديمز سعيد النورسىنڭ رسالۀِ نور أثرلرى باصيلمقدهدر. حصّهسنه دوشن بر مقدار كتاب فيآتلرينى استاديمز، حياتنى نورلره وقف ايدوب نفقهسنى چيقاراميان نور طلبهلرينه تعيين اولارق ويرمكدهدر. كنديسى ده بوگون آرتيق هركسڭ معلومى اولمش اولان أعظمى بر إقتصاد و قناعتله ياشامقدهدر. و بتون عمرى بوينجه فوق العاده بر إقتصاد دائرهسنده كندينى إداره ايتديگنه، سكسان يدى سنهلك حياتنى بر شاهدِ صادق اولارق گوسترييورز.
خلقى دموقرات حكومت عليهنه گچيرمك پلانلرينى تعقيب ايدن مخالف غزتهلرڭ ديگر بر ظاهر يالانلرى ايسه، نازللىده ايكى مبارك آدمڭ رمضانِ شريف حقّندهكى حسبحالنى «إسلامى بر دولت قورمق» گبى سياستوارى بر طرزده تبديل ايتمهلريدر. بو ايسه او ساخته سياست بزرگانلرينڭ، چوجقلرى دخى قانديراميهجقلرى عجميجه بر إفترا و اويدورمالرندن عبارتدر. بويله يالانلرى يايمقله هانگى مقصدلرينڭ إستحصالنه چابالادقلرى كيمسهنڭ مجهولى دگلدر...
نازللىيه هيچ گيتمهمش اولان و اوراده هيچ كيمسهيى طانيميان و قرق سنهدن بَرى (اَعُوذُ بِاللّٰهِ مِنَ الشَّيْطَانِ وَالسِّيَاسَةِ) دييوب، سياستله علاقهسنى كسن، يالڭز و يالڭز قرآن و ايمان حقيقتلريله ايمانى قورتارمق دعواسنه عمرينى حصر ايدن، بونڭ خارجنده دنيوى شيلرله علاقهدار اولميان، سكسان يدى ياشنده و دائما ياتاقده اولان، زهرلى خستهلقلرڭ تأثيراتيله ئولوم نوبتلرى گچيروب «قبر قپوسندهيم» ديين و سكونت و إستراحته پك محتاج اولان سعيد النورسى گبى بر إسلام مؤلّفنى اويله سياسى مقصدلر پشنده قوشويور گبى إفترالرله موضوع بحث ايتمك؛ چوق وجهلرله وجدانسزلقدر، مدهش بر غدّارلقدر، عادى بر يالانجيلق دركهسنه سقوطدر.
هر هانگى بر دين عالمنه، بر بهانه ايله پيغمبرلك إسنادينى ياپمق، طوغريدن طوغرىيه إسلاميته تعرّض و قرآنه بر إهانتدر.
استاديمز سعيد النورسى بتون عمرى مدّتنجه سنّتِ سنيهيه إتّباع ايتمش و بر سنّتِ سنيهيه مخالف حركت ايتمهمك ايچون إعدام جزالرينى هيچه صايمش و سنّتِ سنيهيى إحيا و ايمانى محافظه اوغرنده يوز اوتوز پارچه أثر تأليف ايتمشدر. دين دشمنلرينه قارشى حياتنى إستحقار ايدهرك مجاهده ايتمش و نهايت موفّق و مظفّر اولمشدر. أوت إتّباعِ سنّتِ أحمديهيه (عصم) دائر يازديغى بر أثرى، اوتوز سنهدن بَرى بيڭلرجه نسخه نشر اولنمشدر. فخرِ كائنات رسولِ أكرم (عصم) أفنديمزڭ صوڭ و حق پيغمبر اولديغنه دائر معظّم بر أثرى اولان معجزاتِ أحمديه (عصم) كتابى ده ميداندهدر. حقيقتِ حال بويله اولديغى حالده، سعيد النورسىيه بويله بر إتهامى ياپانلرڭ؛ حق و حقيقتدن، إنصاف و وجداندن نه قدر اوزاق اولديغى قياس ايديلسين. او إتهامى ياپمق، شيطانلرڭ بيله عقلندن گچمز.
بو حادثهنڭ بر سببى ده شو اولماسى قويدر كه؛ رسالۀِ نور، عائله حياتنه بيوك بر فائده ويروب خانملرڭ عفّت، ناموس و عصمتله و سعادتله حيات گچيرملرينى تأمين ايتديگندن، قادينلر رسالۀِ نوره چوقلقله رغبت گوسترمكدهدرلر. بوڭا بر حسنِ مثال، خانملرڭ نشر اولونان بر قاچ مقالهسنى دين دشمنلرى گورمشلر و بولشويكلك حسابنه بر طاقم اويدورما بهانهلرله هجومه گچمشلردر. فقط أصلا موفّق اولاميهجقلردر. اونلرڭ مقصدلرينڭ تام عكسنه اولارق، رسالۀِ نورڭ نشرياتى أرككلر و قادينلر آراسنده خارقه بر طرزده إنكشاف ايتمكدهدر و ايدهجكدر.
طاهرى، زبير، جيلان، بايرام، صونغور، رشدى
(أميرطاغ ل. ٢، سه. ٢١٧)
* * *
حقيقت چكردكلرندن
اوتوز بش سنه أوّل طبع ايديلن «حقيقت چكردكلرى» نامندهكى رسالهدن آلينمشدر.
مريض بر عصرڭ، خسته بر عنصرڭ، عليل بر عضوڭ رچتهسى؛ إتّباعِ قرآندر.
* * *
عظمتلى بختسز بر قطعهنڭ، شانلى طالعسز بر دولتڭ، دگرلى صاحبسز بر قَومڭ رچتهسى؛ إتّحادِ إسلامدر.
* * *
أرضى و بتون نجوم و شموسى تسبيح دانهلرى گبى قالديرهجق و چويرهجك قوّتلى بر أله مالك اولميان كيمسه، كائناتده دعواىِ خلق و إدّعاىِ ايجاد ايدهمز. زيرا هر شى، هر شيله باغليدر.
* * *
سيورىسينگڭ گوزينى خلق ايدن، گونشى دخى او خلق ايتمشدر.
* * *
پيرهنڭ معدهسنى تنظيم ايدن، منظومۀِ شمسيهيى ده او تنظيم ايتمشدر.
* * *
نصرانيت، يا إنطفا ويا إصطفا ايدوب إسلاميته قارشى تركِ سلاح ايدهجكدر. نصرانيت بر قاچ دفعه ييرتيلدى، پروتستانلغه گلدى. پروتستانلق ده ييرتيلدى، توحيده ياقلاشدى. تكرار ييرتيلمغه حاضرلانييور. يا إنطفا بولوب سونهجك ويا حقيقى نصرانيتڭ أساسنى جامع اولان حقائقِ إسلاميهيى قارشيسنده گورهجك، تسليم اولاجقدر.
* * *
إنسان فطرةً مكرّم اولديغندن حقّى آرايور. بعضًا باطل ألنه گلير. حق ظن ايدهرك قويننده صاقلار. حقيقتى قازاركن إختيارسز ضلالت باشنه دوشر؛ حقيقت ظن ايدهرك باشنه گيديرييور.
* * *
باطل شيلرى اييجه تصوير، صافى ذهنلرى إضلالدر.
* * *
عالمِ مرشد، قويون اولمالى؛ قوش اولماملى. قويون، قوزوسنه سوت؛ قوش، ياوروسنه قَىْ ويرر.
* * *
منفعت اوزرينه دونن سياست، جاناواردر.
* * *
آج جاناواره قارشى تحبّب؛ مرحمتنى دگل، إشتهاسنى آچار. هم ده ديش و طيرناغنڭ كراسنى ده ايستر.
* * *
زمان گوستردى كه جنّت اوجوز دگل، جهنّم دخى لزومسز دگل.
* * *
گوزل گورن، گوزل دوشونور. گوزل دوشونن، حياتندن لذّت آلير.
* * *
إنسانلرى جانلانديران أملدر، ئولديرن يأسدر.
* * *
خرستيانلغڭ مالى اولميان محاسنِ مدنيتى اوڭا مال ايتمك و إسلاميتڭ دشمنى اولان تدنّىيى اوڭا دوست گوسترمك، فلگڭ ترس دونمسنه دليلدر.
* * *
هر شيئى مادّهده آرايانلرڭ عقللرى گوزلرندهدر، گوز ايسه معنوياتده كوردر.
* * *
مجاز، علمڭ ألندن جهلڭ ألنه دوشسه، حقيقته إنقلاب ايدر؛ خرافاته قپو آچار.
* * *
شهرت، إنسانڭ مالى اولميانى دخى إنسانه مال ايدر.
* * *
حديث، معدنِ حيات و مُلهمِ حقيقتدر.
* * *
إحياىِ دين، إحياىِ ملّتدر. حياتِ دين، نورِ حياتدر.
* * *
دشمنڭ دشمنى، دشمن قالدقجه دوستدر؛ دشمنڭ دوستى، دوست قالدقجه دشمندر.
* * *
زمان إختيارلندقجه قرآن گنجلشييور، رموزى توضّح ايدييور. نور، نار گورونديگى گبى؛ بعضًا شدّتِ بلاغت دخى مبالغه گورونور.
* * *
صيقنتى، سفاهتڭ معلّميدر. يأس، ضلالتِ فكرڭ؛ ظلمتِ قلپ، روح صيقنتيسنڭ منبعيدر.
* * *
بر لقمه قرق پارهيه، ديگر بر لقمه اون غروشه... آغزه گيرمهدن و بوغازدن گچدكدن صوڭره بردرلر. يالڭز بر قاچ ثانيه آغزده بر فرق وار. مفتّش و قپوجى اولان قوّۀِ ذائقهيى تلطيف و ممنون ايتمك ايچون بردن اوڭا گيتمك، إسرافڭ أڭ سفيهيدر.
* * *
لذائذ چاغيردقجه، صانكه ييدم ديمهلى. صانكه ييديمى دستور ياپان؛ «صانكه ييدم» نامندهكى بر مسجدى ييهبيليردى، ييمهدى.
* * *
بر مجلسِ إخوانه گوزل بر قارى گيردكجه؛ ريا، رقابت، حسد طمارى إنتباه ايدر. ديمك إنكشافِ نسواندن، مدنى بشرده أخلاقِ سيّئه إنكشاف ايدر.
* * *
أڭ بدبخت أڭ مضطرب أڭ صيقنتيلى، ايشسز آدمدر. زيرا عطالت، عدمڭ برادرزادهسيدر؛ سعى، وجودڭ حياتى و حياتڭ يقظهسيدر.
* * *
صبرڭ مكافاتى ظفردر، عطالتڭ مجازاتى سفالتدر، سعيڭ ثوابى ثروتدر، ثباتڭ مكافاتى غلبهدر.
* * *
رسالۀِ نور كلّياتندن طوپلانان بعض وجيزهلر
اللّٰه ايچون ايشلهييڭز، اللّٰه ايچون گوروشوڭز، اللّٰه ايچون چاليشڭز. «للّٰهِ، لِوجه اللّٰه، لِاجلِ اللّٰه» رضاسى دائرهسنده حركت ايديڭز. او وقت سزڭ عمريڭزڭ دقيقهلرى، سنهلر حكمنه گچر.
(لمعهلر، سه. ١٧)
* * *
نفسِ أمّارهنڭ إستبدادِ رذيلهسندن سلامتمز، إسلاميته إستناد ايلهدر. او حبل المتينه تمسّك ايلهدر. و حقلى حرّيتدن حقّيله إستفاده ايتمك، ايماندن إستمداد ايلهدر.
(خطبۀِ شاميه، سه. ٨٥)
* * *
سلطانِ كائنات بردر، هر شيئڭ آناختارى اونڭ ياننده، هر شيئڭ ديزگينى اونڭ ألندهدر؛ هر شى اونڭ أمريله حلّ ايديلير. اونى بولسهڭ، هر مطلوبڭى بولدڭ؛ حدسز منّتلردن، قورقولردن قورتولدڭ.
(مكتوبات، سه. ٢٢٤)
* * *
بو زمانده إعلاىِ كلمة اللّٰه، مادّةً ترقّىيه متوقّف و مدنيتِ حقيقيهيه گيرمكله إعلاىِ كلمة اللّٰه ايديلهبيلير.
(خطبۀِ شاميه، سه. ٣٥)
* * *
مال صاحبى ظن ايتديگڭ أسباب، مال صاحبى دگللردر. أصل مال صاحبى، اونلرڭ آرقهسنده ايش گورن قدرتِ أزليهدر.
(مثنوى، سه. ١٠)
* * *
جنابِ حق حدسز قدرت و نهايتسز رحمتنى گوسترمك ايچون إنسانده حدسز بر عجز، نهايتسز بر فقر درج أيلهمشدر.
(لمعهلر، سه. ١٣)
* * *
إنسانڭ فطرتنده، بقايه قارشى غايت شديد بر عشق وار… بتون فراقلردن گلن فريادلر، عشقِ بقادن گلن آغلامالرڭ ترجمانلريدر.
(لمعهلر، سه. ١٥)
* * *
فانى موجوداتڭ وصالى مادام فانيدر، نه قدر اوزون ده اولسه ينه قيصه حكمندهدر. سنهسى، بر ثانيه گبى گچر؛ حسرتلى بر خيال و أسفلى بر رؤيا اولور.
(لمعهلر، سه. ١٧)
* * *
أى إنسانلر! فانى، قيصه، فائدهسز عمريڭزى؛ باقى، اوزون، فائدهلى، ميوهدار ياپمق ايستر ميسڭز؟ مادام ايستهمك إنسانيتڭ إقتضاسيدر، باقئِ حقيقينڭ يولنه صرف ايديڭز. چونكه باقىيه متوجّه اولان شى، بقانڭ جلوهسنه مظهر اولور.
(لمعهلر، سه. ١٧)
* * *
شو دارِ دنيا، ميدانِ إمتحاندر و دارِ خدمتدر؛ لذّت و اجرت و مكافات يرى دگلدر.
(لمعهلر، سه. ١٠)
* * *
طبيعت بر صنعتِ إلٰهيهدر، ثانع اولاماز. بر كتابتِ ربّانيهدر، كاتب اولاماز. بر نقشدر، نقّاش اولاماز. بر دفتردر، دفتردار اولاماز. بر قانوندر، قدرت اولاماز.
(لمعهلر، سه. ٣٤٢)
* * *
قرآن بر حافظدر، قدرت قلميله كائنات صحيفهلرنده يازيلان آياتى اوقويور.
(لمعهلر، سه. ١٢٨)
* * *
زمان إختيارلندقجه قرآن گنجلشييور، رموزى توضّح ايدييور.
(س.ط. إشارات، سه. ١٠٢)
* * *
كُرۀِ أرضى بر صاپان طاشى گبى چويرن ذاتِ قدير؛ آخرته گيدن مسافرلرينڭ يولنده ناصل بو أرضى قالديرهجق و طاغيدهجق، دينيلير مى؟
(سوزلر، سه. ٨١)
* * *
هيچ ممكن ميدر كه: سماوات و أرضى خلق ايدن بر صانعِ حكيم، سماوات و أرضڭ أڭ مهمّ نتيجهسى و كائناتڭ أڭ مكمّل ميوهسى اولان إنسانلرى باشىبوش بيراقسين، أسباب و تصادفه حواله ايتسين، حكمتِ باهرهسنى عبثيته قلب ايتسين؟ حاشا!
(مكتوبات، سه. ٢٣٧)
* * *
ألده قرآن گبى بر معجزۀِ باقى واركن
باشقه برهان آرامق عقلمه زائد گورونور.
ألده قرآن گبى بر برهانِ حقيقت واركن
منكِرلرى إلزام ايچون گوڭلمه ثقلت مى گلير؟
(سوزلر، سه. ٣٦٥)
* * *
أى إنسان! فنايه، عدمه، هيچلگه، ظلماته، نسيانه، چورومگه، طاغيلمغه و كثرتده بوغولمغه گيتديگڭزى توهّم ايدوب دوشونمهيڭز! سز فنايه دگل، بقايه گيدييورسڭز. عدمه دگل، وجودِ دائمىيه سَوق اولونويورسڭز. ظلماته دگل، عالمِ نوره گيرييورسڭز. صاحب و مالكِ حقيقينڭ طرفنه گيدييورسڭز و سلطانِ أزلينڭ پاىتختنه دونييورسڭز. كثرتده بوغولمغه دگل، وحدت دائرهسنده تنفّس ايدهجكسڭز. فراقه دگل، وصاله متوجّهسڭز.
(مكتوبات، سه. ٢٢٨)
* * *
أى إنسان! سن أگر نفس و شيطانى ديڭلرسهڭ، أسفلِ سافلينه دوشرسڭ. أگر حق و قرآنى ديڭلرسهڭ، أعلاىِ علّيّينه چيقار، كائناتڭ بر گوزل تقويمى اولورسڭ.
(سوزلر، سه. ٣٢٨)
* * *
حشرده سزى إحيا ايدهجك ذات، اويله بر ذاتدر كه؛ بتون كائنات، اوڭا أمربر نفر حكمندهدر… هر شيئڭ ديزگينى ألنده، هر شيئڭ آناختارى ياننده، گيجه و گوندوزى، قيش و يازى بر كتاب صحيفهلرى گبى قولايجه چويرر. دنيا و آخرتى، ايكى منزل گبى بونى قپار، اونى آچار بر قديرِ ذو الجلالدر.
(سوزلر، سه. ٤٢٥)
* * *
بو إنسان ظن ايدر مى كه، باشى بوش قالاجق؟ حاشا!.. بلكه إنسان، أبده مبعوثدر و سعادتِ أبديهيه و شقاوتِ دائمىيه نامزددر. كوچك بيوك، آز چوق هر عملندن محاسبه گورهجك. يا تلطيف ويا طوقات ييهجك.
(لمعهلر، سه. ١٣٨)
* * *
اللّٰهى طانيميانڭ دنيا طولوسى بلا باشنده واردر. اللّٰهى طانييانڭ دنياسى نورله و معنوى سرورله طولودر. درجهسنه گوره ايمان قوّتيله حسّ ايدر.
(لمعهلر، سه. ٢١٠)
* * *
أوت، أگر كائناتدن رسالتِ محمّديهنڭ (عصم) نورى چيقسه، گيتسه؛ كائنات وفات ايدهجك.. أگر قرآن گيتسه، كائنات ديوانه اولاجق و كُرۀِ أرض قفاسنى، عقلنى غائب ايدهجك، بلكه شعورسز قالمش اولان باشنى بر سيّارهيه چارپهجق، بر قيامتى قوپارهجق.
(لمعهلر، سه. ٣٣٦)
* * *
حياتڭ لذّتنى و ذوقنى ايسترسهڭز، حياتڭزى ايمان ايله حياتلانديريڭز و فرائضله زينتلنديريڭز و گناهلردن چكينمكله محافظه ايديڭز.
(سوزلر، سه. ١٤٦)
* * *
حقيقى ذوق و ألمسز لذّت و كدرسز سَوينج و حياتدهكى سعادت يالڭز ايماندهدر و ايمان حقيقتلرى دائرهسنده بولونور.
(سوزلر، سه. ١٥٠)
* * *
دين حياتڭ حياتى هم نورى هم أساسى. إحياىِ دين ايله اولور شو ملّتڭ إحياسى.
(سوزلر، سه. ٧١٧)
* * *
دارِ فانيدن دارِ باقىيه دونيلهجك و قديمِ باقينڭ مقرِّ سلطنتِ أبديهسنه گيديلهجك و كثرتِ أسبابدن واحدِ ذو الجلالڭ دائرۀِ قدرتنه گيديلهجك، دنيادن آخرته گچيلهجك. مرجعڭز اونڭ درگاهيدر، ملجئڭز اونڭ رحمتيدر.
(مكتوبات، سه. ٢٥٢)
* * *
ايمان، هم نوردر هم قوّتدر. أوت، حقيقى ايمانى ألده ايدن آدم، كائناته ميدان اوقويهبيلير.
(سوزلر، سه. ٣١٤)
* * *
ايمان، إنسانى إنسان ايدر. بلكه إنسانى سلطان ايدر.
(سوزلر، سه. ٣١٥)
* * *
جنابِ حقّى طانييان و سَون، نهايتسز سعادته، نعمته، أنواره، أسراره؛ يا بِالقوّه ويا بِالفعل مظهردر. اونى حقيقى طانيميان، سومهين؛ نهايتسز شقاوته، آلامه و أوهامه معنًا و مادّةً مبتلا اولور.
(مكتوبات، سه. ٢٢٣)
* * *
ايمان، بر معنوى طوباءِ جنّت چكردگنى طاشييور. كفر ايسه معنوى بر زقّومِ جهنّم تخمنى صاقلايور.
ديمك سلامت و أمنيت، يالڭز إسلاميتده و ايماندهدر.
(سوزلر، سه. ١٧)
* * *
قرآن ييلديزلرينه پرده چكيلمز. گوزينى قپايان يالڭز كندى گورمز، باشقهسنه گيجه ياپاماز.
سعيد النورسى
(مكتوبات، سه. ٦٦)
* * *
فهرست
إفادۀِ مرام
پيغمبريمز حضرتِ محمّد مصطفى عليه الصلاة والسلامڭ أڭ صوڭ پيغمبر اولديغنى، أڭ گوزل بر شكلده رسالۀِ نورڭ مختلف أجزالرنده و بِالخاصّه معجزاتِ أحمديه رسالهسنده ايضاح و إثبات ايدن، بديع الزماندر. بيڭلر نمونهدن ايكى نمونهسى
بو پارچه آلتون و ألماس ايله يازيلسه لياقتى وار
رسالۀِ نور سياست جريانلرندن صوڭ درجه اوزاقدر. يڭى سعيد نه ايچون بو قدر شدّتله سياستدن تجنّب ايدييور؟
ايكنجى وهملى سؤال: أهلِ دنيا دييورلر كه: سڭا ناصل أمنيت ايدهجگز كه سن دنيامزه قاريشميهجقسڭ؟ سنى سربست بيراقسهق بلكه دنيامزه قاريشيرسڭ. هم ناصل بيلهجگز كه سن قورنازلق ياپمييورسڭ؟ كندينى تاركِ دنيا گوستروب خلقڭ مالنى ظاهرًا آلماز، گيزلى آلير بر قورنازلق اولماديغنى ناصل بيلهجگز؟
اوچنجى وهملى سؤال: أهلِ دنيا دييورلر كه: سن بزى سَور ميسڭ؟ بگهنييور ميسڭ؟ أگر سَورسهڭ نهدن بزه كوسوب قاريشمييورسڭ؟ أگر بگنمييورسهڭ بزه معارضسڭ، بز معارضلريمزى أزرز؟
دردنجى شبههلى سؤال: أهلِ دنيا دييورلر كه: او قدر بلالر گوردك كه، كيمسهيه أمنيتمز قالمادى. سڭا ناصل أمين اولابيليرز كه؛ فرصت سنڭ ألڭه گچسه، آرزو ايتديگڭ گبى قاريشمازسڭ؟
رسالۀِ نور طلبهلرينڭ يگانه غايهلرى رضاىِ إلٰهيدر، دستورلرى إخلاصدر
علومِ ايمانيه رضاىِ إلٰهيدن باشقه هيچ بر شيئه آلَت اولاماز
استادڭ لاحقه مكتوبندن
اوچنجى سؤالڭز: دنيانڭ سياستنه قارشى نه ايچون بو قدر لاقيدسڭ؟ بو قدر صفحاتِ عالمه قارشى طورينى هيچ بوزمييورسڭ؟ بو صفحاتى خوش مى گورييورسڭ؟ وياخود قورقويور ميسڭ كه، سكوت ايدييورسڭ؟
يگانه غايه، مقصد رضاىِ إلٰهى يولنده خدمتِ قرآنيه و ايمانيه اولوب هر درلو أذيت و إشكنجهلره قارشى دخى منفى حركتلره توسّل ايديلمهمسى حقّنده، استاد بديع الزمان حضرتلرينڭ آنقرهده نور طلبهلرينه ويرديگى درسدن بر قسم نوطلر
رسالۀِ نور، بتون أجزالرنده باشدن باشه حقائقِ ايمانيهيى إثبات و ايضاح ايتمكدهدر
رسالۀِ نور نسلِ آتىيى، بيوك بر تهلكهدن قورتارمغه وسيله اولويور
استاد سعيد النورسى؛ تصوّف، طريقت درسى دگل بلكه حقائقِ ايمانيه درسى ويرييور و عقائدِ إسلامڭ تقويهسنه چاليشييور
رسالۀِ نور و طلبهلرينڭ أمنيت و آسايشڭ تأميننه بيوك خدمتلرى وار
كردجيلك، توركجيلك وسائره گبى منفى ملّيت فكرى، إسلاميت ملّيتنى پارچهلامق ايچون خارجدن ايچمزه صوقولمش ئولديريجى بر زهردر (سعيد النورسىنڭ ملّيتجيلك گوروشى)
شيمدى أڭ مهمّ بر هجوم بنم شخصمهدر. دييورلر كه: «سعيد كرددر، نهدن بو قدر اوڭا حرمت ايدييورسڭز، آرقهسنه دوشويورسڭز؟»
حميتِ دينيه مى يوقسه حميتِ ملّيه مى داها قوّتلى، داها لازم؟ (بر تمثيل ايله ايضاحى)
بديع الزمان ٣١ مارت وقعهسنده ياتيشديريجى اولديغنى إثبات ايدن ديوانِ حربِ عُرفيده ويرديگى إفاده و ويريلن برائت
دينده رفورمجيلره بديع الزمانڭ جوابى
مدنيتده ترقّى، آسايش و أمنيتڭ تأمينى نه ايله اولور؟
استاديمز حياتنده هديه دخى آلمادى
بديع الزمانڭ گچيم و معيشتى ناصلدر؟
خدمتِ قرآنيه و ايمانيهده أعظمى فداكارلق لازمدر. (أولنمك مسئلهسى)
صقال و جمعه مسئلهسى
رسالۀِ نور بنم مالم دگل، بنم هنرم اولاماز.
بديع الزمان و طلبهلرى هيچ بر جمعيت و تشكيلاتله علاقهلرى يوقدر
بديع الزمان حضرتلرينڭ مسلمانلرڭ إجتماعى حياتلرنده تشخيص ايتديگى مدنيت ترقّياتنه مانع اولان آلتى خستهلق و تداويلرى ايچون أجزاخانۀِ قرآنيهدن آلديغى آلتى كلمه
بديع الزمان حضرتلرى بتون حياتنى سنّتِ سنيه اوزره گچيرمش و أثرلرنده إتّباعِ سنّتڭ نه قدر أهمّيتلى اولديغنى بيان ايتمشدر
راديو، بيوك بر نعمتِ إلٰهيهدر
راديو، زمين يوزينى بر مكتبِ ايمانى حكمنه گتيرمگه وسيله اولاجقدر
غزتهجىيه قيصه بر درس
مدنيتڭ فن و صنعت خارقهلرى حقّنده ايكى مهمّ سؤاله ويريلن جواب
قونوشان يالڭز حقيقتدر
«بعض غزتهلرڭ، نور طلبهلرى حقّندهكى أصلسز نشرياتلرينه جوابدر.» باشلقلى، محكمهدن گچمش بر تكذيب مكتوبى
حقيقت چكردكلرندن
نور كلّياتندن طوپلانان بعض وجيزهلر
* * *