بيلييورسڭز كه، چوق إفادهلرمده سزى تقليد ايتديگم برنجى سببى، مربوطيتِ خالصانهمڭ؛ ايكنجى سببى، قدرتِ قلميهمڭ كفايتسزلگيدر. فقط مبارك يگرمى دردنجى سوزده مثالى گچن فقير گبى، بن ده ديرم: أى سَوْگيلى استادم، أگر گوجم يتسه، أليمدن گلسه بتون او نورلى سوزلر عيارنده كلمهلردن مركّب جملهلرله سزه معروضاتده بولونمق ايسترم. فقط بيلييورسڭز كه، يوق. نيّتمه گوره معامله بيوريڭز.
خلوصى
* * *
أثر، أمثالى گبى نورلى و حكمتليدر. إن شاء اللّٰه تمنّى بيورديغڭز وجهله اُمّتِ محمّدڭ إجتماعى و پك مهمّ بر يارهسنه قطعى دوا اولور. طوغريدن طوغرىيه نورِ قرآن اولان مبارك سوزلرڭ قصد و إشارت ايديلمك ايستهنيلديگنى عرض ايتدم و مقامِ تصديقده شيمدىيه قدر كنديسنه بر قاچ سوزى ده اوقودم و إمكان بولدقجه ده اوقويهجغم. لَا يُعَدّ وَ لَا يُحْصٰى نعمِ سبحانيهسنه مظهر اولديغم اللّٰه ذو الجلال تبارك و تعالى و تقدّس حضرتلرينه حمد و شكردن عاجز، عصيان ايله آلوده ايكن ذاتِ استادانهلرى بزى إذنِ ربّانى ايله او مبارك منوّر سوزلر ايله إرشاد ايدوب ظلمتدن نوره چيقارديڭز.
تحرّئِ حقيقت ايله عمر گچيرر ايكن مقدّرات بو عاصى بيچارهيى ده بش سنه أوّل شاهِ نقشبند حضرتلرندن محمّد الكفروى حضرتلرينه طوغرى آچيلان طريقِ نقشبندىيه إدخال أيلهمشدى. صوڭره موقّت بر كسوف نتيجهسى اولارق يول غائب اولمش، ظلمت و تيكنلر ايچنده قالينمش ايكن نورلى سوزلريڭزله ظلمتدن