اوقونهبيلير، خطالى خطّى ايله يازيلماسى ده، حمد و شكريمى آرتيرمغه وسيله اولويور. و هر واسطه ايله آلديغم مسرّتبخش سلام و إلتفاتاتِ فاضلانهلرينڭ و هر برى رسالۀِ نوره بر ذيل و تفسير و حاشيه مقامندهكى جهاندگر أمرنامۀِ عارفانهلرندن مادّةً دور بولونهجغمدن طولايى چوق متأثّر اولاجغم.
فقط معنوى جهتى بويله دوشونمييورم و نرهده بولونورسهم بولونهيم، عنايتِ بارى ايله آلديغم درسى ديڭلتهجك بر مخاطب بولمغه چاليشهجق و نشرِ حقيقت يولنده عجز و فقريمه باقميهرق، دعاڭزله أليمدن گلن هر چارهيه باش ووراجغم ايچون متسلّى اولويورم.
يالڭز، دنيوى وظيفهلر ايله اوغراشمق ايسه، فطرةً خوشلانديغم و حقائقنه مجلوب اولديغم نورلى سوزلرله إشتغالمه قسمًا مانع اولويور. ايشته بوڭا متأسّفم، فقط أليمدن بر شى گلمييور. هر گچن گون دنيانڭ فنا و فانى يوزينى داها زياده عريانلغيله گوسترمكده و بو حياتده باقى و سرمدى حيات ايچون بر شى قزانيلمادن گچن وقتلره تأثّر حاصل ايتديرمكدهدر. صورةً آيريلديغمزه او قدر متأثّر دگلم. بِالخاصّه سَوْگيلى استادڭ صوڭ درسى، بو فانى دنيانڭ أڭ ذوقلى حالندن پك چوق يوقارى درجهده بر باقى حيات اولديغنى قطعيتله مژده ايتمكدهدر.
خلوصى
* * *
گوڭل ايستردى كه، او معظّم سوزلره سونوك يازيلرمله برآز اوزون جواب يازايم. فقط بوڭا موفّق اولامييورم. قابليتمڭ آزلغى، إستعداديمڭ قيصهلغى، إقتداريمڭ نقصانلغيله برابر عهدهمه ويريلمش اولان بر قاچ مادّى وظيفهلرڭ تحتِ تأثيرنده دماغم مشغول و عادتا مشبوع اولديغندن، او مبارك جوهرلريڭزه مقابل عادى بونجق بيله إبراز ايدهميهجگم.