أوت آلتى يدى سنهدن بَرى خوش و شيرين بو منظرهيى گورن لطيف و نظيرسز بر گُلِ محمّدىيى (عصم) قوقلايان اُمّتِ محمّد (عصم) سورۀِ كوثردن «بِحَمْدِهِ وَ الْمِنَّه» مكافاتِ روحيهسنى و دماغيهسنى آلدى. و بو نقطهيه روحم أمين ايدى كه؛ چوقدن بَرى أهلِ ايمان و توحيد، إسلاميت گبى باقى و سرمدى گونشڭ كسوف و اُفولنه جاناوارجهسنه چاليشمغى كندينه وظيفه عدّ ايدن أهلِ ضلالتڭ پيس پروغراملرينى گوروب نومِ غفلتدن اويانهرق، سورۀِ كوثرى تعقيب ايدن ايكى سورهيى لسانِ حال و قال ايله اوقويهرق زنديقلره خطابًا، «بزلر سزڭ نفاق دڭزنده سرسريانه و ظلمكارانه گزن ضلالت و سفاهت گميلريڭزه بينهمهيز؛ آنجق، قرآنِ معجز البيانڭ نورانى و توحيد سكّهلى ايمان و إسلام زرهليلرينه بينرز. منزللريمزه وارديغمزده موفّقيت و ثمرۀِ سعيمز تظاهر و تحقّق ايدر.» دييه باغيرهرق و (اِذَا جَٓاءَ نَصْرُ اللّٰهِ) إلخ.. فرمانِ مبيننى تلاوتله، سورۀِ كوثرڭ مژده و بشارتى بزلرى قوّت و متانته سَوق، هم بهجت و مسرّته يتيشديردى. معروضاتيله نصرت و فتوحاتڭ گلمهسى قوقوسنى آلارق، فوج فوج دائرۀِ قرآنيهيه عرضِ دخالت ايتديلر. بو خصوصده تسبيح و تحميدڭ أهمّ وظيفهلرى اولديغنى آڭلايهرق توبهلرينى ردّ ايتمهين جنابِ ربّ العزّة حضرتلرينه إستغفاره شتاب ايدوب صلاح و فلاح و فوز نجات يوللرينى طوتديلر.
«همان ربّم، حقيقى ورثۀِ أنبيايى تكثير، دنيوى و اُخروى آمال و مقاصدينه موفّق بيورسون» دعاسنى تكرار ايله برابر اوننجى سوزڭ عاجز قلممه قوماندا ويروب يازديرديغى شو عريضهجغمى تقديمه جرئت ايدر، بِالخاصّه دست و دامنِ معلالرينى اوپرم أفنديم.
هامش: خرمان اورتهسنده مولوىوارى طولاشان بو بيچاره چيفتجى، سوزلرينى ده ايشلديگى ايشه بڭزهتهرك، سويلهديگنى تكرار سويلهمش؛ گچديگى يره دونمش، ينه گلمش ايسه ده، نه ياپسين؟ استادى، ييلديرم گبى