(صبرينڭ فقرهسيدر)
استادِ أعظم أفنديم حضرتلرى!
بو دفعه خوش و لطيف توافقاتيله نورانى يولجيلره دستِ معنويسنى اوزاتارق، ضيادار پارمغيله «بزلر باشى بوش، گليشى گوزل سرپيلمش شيلر دگلز. بلكه موازنۀِ تامّه و توافقِ حقيقيه و بر قياسِ قطعيه ايله إنكشاف و تموّج ايدن كتابِ سماويۀِ قرآنيهنڭ مثالسز برر ييلديزلرىيز.» دييهرك، بالاسى زيرينه، صاغى صولنه أيادئِ معنويهسيله مصافحه و مقابله ايدرجهسنه، توافقاتى مشاهده ايديلن كتابِ مبينڭ لمعات و ترشّحاتنڭ توافقاتى، اوننجى سوزده دخى مشاهده ايديلدى. بو سوزڭ معنيدار و حكمتدار توافق و إنتظاملرى، صانكه كمالِ حرارتله يكديگرينه مشتاق و متحسّر بر قاچ صميمى و جدّى قارداش و آرقداشلرڭ وصلتلرى گبى، قرآنِ عظيم الشانڭ هر بر آيات و كلامى، تحتِ تصرّفنه آلديغى كلمه و كلاملرى، ينه سماواتڭ حدسز ألكتريقلرى اولان ييلديزلر گبى پارلاتارق، شو لطافتلرى ايله، إنسانيت تعريفنه تام داخل اولان ذىشعورى مست و حيران بيراقييور.
شوراسى ده شايانِ حيرتدر كه: شو مبارك اوننجى سوز، موضوعى اولان حشر مسئلۀِ مهمّهسى، كائناتڭ ختامِ عمرينه معلّق و مقدّر اولديغى گبى، رسالة النور آراسنده دخى، بو سوزڭ أڭ صوڭ توافقاتنى گوسترمسى ده آيريجه بر توافقدر دييورم. جنّت نهرلرى ديمك اولان قرآنى نهرلرى، أنواعِ درلو آوازيله جوشقون جوشقون آقسين آقسين كه؛ زمانِ جاهليت و دورِ فترتده، صوڭ درجه إحتياجلى اولان أقوام اوزرلرينه طلوع ايدن شموسِ قرآنيهنڭ سرعتله إنكشاف و توسّع و نوعِ بشرڭ خُمسنى إحيا، أبدى و دائمى بر نورله تنوير و إضائه أيلديگى گبى، شو عصرِ ضلالت و خسران و دورِ بدعت و طغيانده، أهلِ ايمان و توحيدڭ يارهلى روحلرينه مرهم اولسون.