أفندى، إمام حافظ عُمَر أفندى و ديگر سوزلرله علاقهدار اولانلر سلام و دعا ايدييور، خير دعاڭزى ايستهيورلر.
دوامِ عافيت و موفّقيتڭزى تكرار ألطافِ إلٰهيهدن تضرّع و نياز أيلر، مبارك أللريڭزى كمالِ حرمت و تعظيمله تقبيل أيلر، قصوريمڭ عفوينى و خير دعاڭزدن بو بيچاره صديقڭزى چيقارمامڭزى خاصّةً عرض و إسترحام أيلرم.
اَلْبَاقِى اَلْحُبُّ فِى اللّٰهِ
خلوصى
* * *
(سعيدڭ فقرهسيدر)
(خلوصى گبى مهمّ بر طلبهمڭ بڭا گوندرديگى هديهسنڭ إعادهسنه دائر يازديغم بر مكتوبى، آرقداشلريمڭ تنسيبلرينه بناءً اونلرڭ فقرهلرى ايچنه درج ايديلدى.)
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، وفادار آخرت قارداشلرم حاجى نوح بك، منلا حامد!
سزلر بنم ايچون چوق أهمّيتليسڭز. «صديقِ وفى بو زمانده يوقدر» ديينلره قارشى سزلرى گوسترييورم. يگرمى سنه وانده گچيرديگم حياتِ علميه.. بنم ايچون وان چوق قيمتداردر. لِلّٰهِ الحمد سزلر او قيمتدارلغى گوسترديڭز. و وانه