ديمشدم. فقط أگر سن، او قارداشڭى كندى نفسڭه ترجيح ايدرسهڭ و اوڭا زحمت ويرمهمك ايچون زحمت چكسهڭ اوڭا قاريشمام. سنڭ پدر و والدهڭه و فتحى گبى آرقداشلريڭه و سنڭ أسكى خواجهلريڭه سلام و دعا ايدرم، دعالرينى ايسترم.
اَلْبَاقِى هُوَ الْبَاقِى
قارداشڭز
سعيد نورسى
٢١ رمضانِ شريف
(عبد المجيده يازيلان مكتوبى، سنڭ مكتوبڭڭ ايچنه قويدم، اوڭا گوندريڭز.)
* * *
(برادرلرينه يازدقلرى مكتوبدن)
أگر أحوالِ روحيهمى آڭلامق ايسترسهڭ، گلهجك شو ايكى فقره ترجماندر. بر شاعرڭ ديديگى گبى ديرم:
(نَىْ) گبى هر دم كه، گچمش عمريمى ياد أيلرم.
تا نَفَس وار ايسه، قورو جسممده فرياد أيلرم.
بر تجارت قيلمادم، نَقْدِ عمر اولدى هبا،
يوله گلدم، لٰكن گوچمش جمله كروان بىخبر.
آغلايوب نالان ايدوب، دوشدم يوله تنها غريب،
ديده گريان، سينه بريان، عقل حيران، بىخبر
أوت گچمش عمرى إسراف ايتدك، ضايع ايتدك. چوق مبارك ذاتلر، أحبابلر غائب ايتدك، يالڭز قالدم. او مباركلرله برابر آخرته چاليشمادم.
* * *