(خسروڭ فقرهسيدر)
عزيز استادم!
جماذى الآخر آينده وقوع بولان (وَاِذَا الْكَوَاكِبُ انْتَثَرَتْ) آيتنڭ إفاده ايتديگى حالاتڭ بر نمونهسنى ايضاح ايدن حادثاتِ سماويه ايله، قرآنڭ سماسنده پارلايان لفظۀِ جلال ييلديزلرينڭ عجيب و طاتلى توافقلرينى درس ويرن او قيمتدار مكتوبڭزى، حافظ على قارداشمز ده داخل اولديغى حالده رأفت، بكر، لطفى، رشدى، كچهجى مصطفى أفندى و آغابگم على أفندى ايله برابر اوقودق. او گيجه مجلسمز پك طاتلى ايدى. حادثاتِ سماويهيى حيرت و تعجّبله و پك بيوك بر سَوينجله قارشيلايهرق، ملأِ أعلانڭ بايراملرينه بز ده إشتراك ايتمشدك. ناصلكه بو حادثۀِ سماويهنڭ برنجى دفعه وقوعى، (باشده إنسان صورتنده ياپيلمش هُبَل تعبير ايتدكلرى بيوك پوتلريله ٣٦٠ پوتى إلٰه قبول ايدن) مشركينِ قُريشڭ هلاكنه نتيجه ويرمشدى.
إن شاء اللّٰه بو ايكنجى وقوع ده اون دردنجى عصرِ محمّديده و آوروپا ترقّياتى ايله إفتخار ايتديگى و يگرمنجى عصر نامنى آلان بو گونده، أهلِ فترتڭ پوتپرستلگندن داها فجيع بر صورته گيرن صورتپرستلگنڭ كوكى كسيلهجگنى، بزه إعلان ايدييوردى.
بو إعلان، اُمّتِ مرحومۀِ محمّديهيه پك گوزل و پك خيرلى بر فتوحاتى حاضرلاديغنى خاطرلاتهرق، محزون قلبلريمزى شنلنديرمش، آغلايان يوزلريمزى گولديرمش، غمناك چهرهلريمزه بشاشت سرپمشدى. دماغمزده عصرِ سعادتڭ او جاذبهدار حياتنى جانلانديرمش، گويا ماضىيى إستقباله چويرهرك، بر مدّت او عالمده و او نزيه روحلى، علوى دوشونجهلى إنسانلر آراسنده ياشاتمشدر.