واسطهسيله أسرارِ قرآنيهيى بنم إمداديمه يتيشديردى. نفسِ أمّارهنڭ او بليّهسندن قورتولدم. اون بش سنهدر حقيقته گيدن يولى آرامق ايچون، چوق قپولر چالدم. چوقلرنده دنيايه عائد زينتلرى گورديگمدن گرى چكيلدم، فقط لِلّٰهِ الحمد تام بر قپو بولدم. جنابِ حق بنى او قپويه تام خدمتكار ياپوب ثبات ويرسين. بو ظلمتلى عصرده حقائقِ ايمانيهنڭ أنوارينى نشر ايدن رسالۀِ نور، نه درجه پارلاق اولديغى و هركسه منفعتلى بولونديغى إنكار ايديلمز. إنكار ايديلسه بيلمهمزلكدن و آڭلامامازلقدندر. (آڭلايانه سيورى سينك ساز گلير، آڭلاميانه طاول زورنا آز گلير.) جنابِ حق گوزلريمزڭ پردهلرينى قالديرسين، حقائقى حقّيله بزه گوسترسين، آمين.
باباجان محمد على
* * *
(بيڭباشى عاصم بگڭ فقرهسيدر)
محترم استادم أفنديم!
هر دفعه اولديغى گبى بو كرّه ده نامستحق اولديغم حالده حقِّ فقيرانهمده لطف و إبذال بيوريلان إلتفاتاتِ بىنهايه بو فقيرى مست ايدييور. نه ياپاجغمى شاشيرييورم. آنجق جنابِ لم يزل حضرتلرينڭ لطف و كرم و إحساننه حمد و شكر و ثنا ايدهرك رسالۀِ شريفهلره صاريلييورم. و لذّت آلوب، سز استاديمى قارشيمده و يانمده بولوب متحيّر و متفكّر اولارق بحرِ سروره طالوب گيدييورم. و بو حالڭ دوام و تزييدينى ألطاف و عنايتِ سبحانيهدن نياز ايدييورم. ناصل ايتميهيم؟ يا حضرت! فقيره بونجه إلتفاتدن باشقه هله بو دفعهكى لطفنامهلرينڭ باشنه بر چوق توصيفدن صوڭره «خدمتِ قرآنيهده قوّتلى آرقداشم و طريقِ حقده و أبد يولنده