(باباجان محمد علىنڭ فقرهسيدر)
أى بنم روحِ جانم استادم حضرتلرى!
سزه قارشى حقّيله طلبهلك وظيفهسنى ايفا ايدهمييورم و رسالۀِ نوره تام خدمت ايدهمييورم. چونكه رسالۀِ نورله تظاهر ايدن قوّت و قدرت، ذكاوت، أسرار و أنوارى دوشوندكجه، تفكّر ايتدكجه كندمدن گچوب، بىهوش قالييورم. اويله يوكسك يرلره چيقامييورم. إن شاء اللّٰه جنابِ حقّڭ إذنيله، قوللرينه بخش ايتمش اولديغى أڭ قيمتدار جواهردن بيڭ قات زياده قيمتلى بولونان قرآنِ حكيمڭ سرلرينى إظهار ايدن رسالهلردن گوجم يتديگى قدر إستفادهيه چاليشهجغم. گوندوز دردِ معيشتله وقت بولاماديغمدن، گيجهنڭ بر قسمنى او نورلرله ايشيقلانديرهجغم.
او نورلرى يازدقجه قلمم و قلبم غايت شيرين و روحانى بر سَوينج حسّ ايدييورم. جنابِ حقّه ناصل حمد و شكر ايدهجگمى بيلهمييورم. بعضًا او رسالۀِ نورڭ أنوارينه قارشى إختيارم أليمدن گيدييور. غفلتلى گچمش زمانمى دوشوندكجه محزون و مكدّر بولونويورم. بو نورلرى بولدقدن صوڭره إستقبالمى گوردكجه قهقهه ايله گولويورم، فرح اولويورم و مفرّح اولويورم. اون بش سنهدر بويله بر خدمتى آرزو ايدييوردم. دنيانڭ چوق صفحاتِ حياتنى و ذوقياتنى گوردم. بو أبده قارشى آرزويى تطمين و إشباع ايتمييورديلر.
ايشته تام او آرزويى تطمين و تأمين ايدهجك غدايى رسالۀِ نورده بولدم، الحمد لِلّٰهِ. شيمدىيه قدر نفسم دنيانڭ ظاهرى ذوقلرينه قاپيلمش و بنى ديگر بر عالمڭ زندانلرينه قدر سَوق ايتمگى قورمش و بر درجه موفّق اولمشدى و بڭا بينمشدى. شيمدى (وَهُوَ عَلٰى كُلِّ شَىْءٍ قَدٖيرٌ) اولان جنابِ مولا و تقدّس حضرتلرينه حدسز حمد و شكر ايدييورم كه، سعيد إسمنده بر ذاتڭ