﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ بِعَدَدِ عَاشِرَاتِ دَقَائِقِ اَيَّامِ الْفِرَاقِ﴾
عزيز، صدّيق، مخلص، خالص قارداشم!
أوّلا: سزڭ بايرامڭزى و نورلرله جدّى إشتغالڭزى و دائما برنجيلگى نور درسنده و صداقتنده محافظه ايتمهڭزى، بتون روح و جانمله تبريك ايدرم.
ثانيًا: هيچ مراق ايتمه، سنڭله مخابره معنًا دوام ايدر. بتون مكتوبلرمده «عزيز، صدّيق قارداشلرم» ديديگم زمان مخلص خلوصى صفِّ أوّل مخاطبلرڭ ايچندهدر.
ثالثًا: نورلر پك پارلاق و غالبانه فتوحاتى گنيش بر دائرهده دوام ايدييور. «سِرًّا تَنَوَّرَتْ» سرّيله، پرده آلتنده داها زياده ايشلهيور. ايكى ماكينه، بيڭ و بش يوز قلملى ايكى كاتب اولماسيله، إن شاء اللّٰه زمين يوزينى ده ايشيقلانديرهجق درجهده درس ويرهجك.
قارداشم بن ده سنڭ فكرڭدهيم كه، نور خدمتى ايچون قدرِ إلٰهى سنى گزديرييور. أڭ محتاج يرلره سَوق ايدر. خصوصًا او حوالى، مملكتم. گوزل لوحۀِ حقيقتڭ لاحقهلرينه گچيرمك ايچون، نور شاكردلرينه گوندردك. او جوارده نورلرله علاقهدار ذاتلره سلام.
اَلْبَاقِى هُوَ الْبَاقِى
سنى اونوتميان خسته قارداشڭز
سعيد النورسى
برادرزادهم نهادڭ گوزلرندن اوپرم. او ده باباسى ايله برابر دائما دعامدهدر.
* * *