أى نورِ قرآن و أى حقيقتِ ايمان! مادام كه بوگون اوچ يوز أللى ميليون إسلامڭ پيشوالغنى قرآن نامنه درعهده ايدييورسڭ. او حالده عصرلردن بَرى أهلِ إسلام آراسنه گيرمش و يرلشمش اولان كوتو إعتقاد و إختلافلرى قالديرهرق، حكم سورن فتنه و فسادى، نفاق و شقاقى دخى كوكندن قوروتوب سوادِ أعظم اولان بو اُمّتِ مرحومۀِ محمّديهيى (عصم) بيوك بر كتله و بر فرقۀِ ناجيه حالنده قرآنڭ جناحِ رأفت و رحمتى آلتنده إن شاء اللّٰه تا صبحِ محشره قدر نورِ قرآنله صاقلايهجقسڭ.
«نه ايسترسهڭز بندن صوريڭز، خبر ويرهيم سزه. صورڭ بڭا ماضيدن، حالدن و إستقبالدن» دييه أصحابِ عظام آراسنده كندينى عالمه إعلان و هر مشكلى ايضاح و بيان و (اَنَا مَدٖينَةُ الْعِلْمِ وَعَلِىٌّ بَابُهَا) حديثِ شريفنى إثبات و عيان ايدن ناشرِ علم و عرفان و واقفِ أسرارِ قرآن جنابِ حضرتِ حيدر ايله (سَلُونٖى قَبْلَ اَنْ تَفْقِدُونٖى فَاِنَّهُ لَا يُحَدِّثُ اَحَدٌ بَعْدٖى) دييه باغيران مجتهدلر سرتاجى إمامِ جعفردن صوڭره إسلام دنياسندهسڭ. او ذاتلرڭ فيضندن گلوب بو عصرده تمثّل ايدهرك (سَلُونٖى عَمَّا شِئْتُمْ) دييه هايقيران و هر معمّايى آچان، هر حائلى قالديران و هر مانعهيى آشان اوچ مناديدن أى رسالۀِ نور بر اوچنجيسى سنڭ شخصيتِ معنويهڭدر. مظهر اولديغڭ إسمِ رحيم و حكيم و بديعڭ جلوهلريله نورِ صافى و سرمديسيله، بو مرآتِ معلاّ و مصفّاڭدن عالمه نه جلوه و جنبشلر و نهلر سير ايتديروب، نهلر گوسترييورسڭ.
قرآنڭ ايمان حقيقتلرى قارشيسنده پريلر پشڭده، روحانى و مَلكلر، بابا اوغل، باى گدا، يار أغيار حلقۀِ تدريس و أنوارڭده عين صفده ديز ديزه اوطوروب و هپ سنى ديڭلهيوب روحلره غدا و شفا و سرورى سندن آلييورلر.