و قدرت، شوكت و عظمتڭى و أبدى نوريڭى گوستروب اونلرى صوصديرمق، اونلرى زبون و مغلوب و رشديڭى إثبات ايتمك و حقِّ حياتڭى اونلره ده تصديق ايتديرمك ايچون چيقمشدڭ. نهايت گوزلر طولديران نوريڭه طايانهميهرق عصاىِ إنكار و إعتراضلرينى قيروب يرلره فيرلاتهرق سڭا تسليم و تابع اولديلر.
هم محكمهلره سنڭ أجزالرڭ بر مجرم و بر جانى و بر مظنون صفتيله دگل؛ بلكه بر معلّم، بر مربّى و بر مرشد اولارق گيرمشديلر. هر ديوانِ عدالتده أڭ بيوك دهشت و صولتڭى، عظمت و عزّتڭى غايت پارلاق و شعشعهلى بر صورتده گوسترهرك اونلرى ده ايمان و قرآن صوييله ييقادڭ. اورايه ده تازه بر روح و تازه بر نفخه اوفلهدڭ.
هله سن او عاشق و صادق طلبهلريڭى، بر قافلۀِ ملائكه گبى صف صف ايدوب و هپسنڭ باشنه حضرتِ استادى بر باش قوماندان تعيين ايدهرك «إذنِ إلٰهى ايله يورو أى قافلۀِ نور!» دييه قوماندا ايتديگڭ وقت، او سطوتلى و شوكتلى نورِ ايمان اوردوسنڭ كمالِ سكون و وقار ايله يوللردن گچيشنى هر صنف خلقدن يوزلرجه كيشى سير ايدوب سلاملايور، روح و جانيله او نورانى آلايى تبريك و تبجيل ايدييوردى. بو منظرۀِ منوّرهيى كورلر بيله گورمش، صاغيرلر بيله ايشيتمش، قلبسزلر بيله آغلامشدى.
و حپسخانهلره قوشمقلغڭ سرِّ حكمتى ايسه؛ ييللردن بَرى اوراده نورسز، چيراسز ياتوب بكلهين محكوملر و محبوسلر، «أى نورِ قرآن بزه ده يتيش. بورادن چيقوب قورتولمغه و سڭا وارمغه بزه مساعده و مجال يوق، لٰكن سن هر يره گيرر چيقارسين، سڭا ياساق يوق. امان بزى اونوتما، بزى مأيوس و محروم بيراقمه. يارين حضورِ پاكِ إلٰهىيه پاك اولارق چيقهبيلمكلگمز ايچون جُرم و عصيانمزله