تجلّئِ أعظمنى گوسترييور. و او تجلّيدن آڭلاشيلييور كه: سائر موجودات گبى شو دنياده‌كى تحوّلاتِ ذرّات دخى، غايت عالى حكمتلر ايچون قدرڭ چيزديگى حدود اوزرينه قدرتڭ ويرديگى أوامرِ تكوينيه‌يه گوره حسّاس بر ميزانِ علمى ايله جولان ايدييورلر. عادتا باشقه يوكسك بر عالمه (حاشيه) گيتمگه حاضرلانييورلر. اويله ايسه ذى‌حيات جسملر، او سيّاح ذرّه‌لره گويا برر مكتب، برر قيشله، برر مسافرخانۀِ تربيه حكمنده‌در. و اويله اولديغنه بر حدسِ صادقله حكم ايديله‌بيلير.
الحاصل: برنجى سوزده دينلديگى و إثبات ايديلديگى گبى؛ هر شى «بسم اللّٰه» دير. ايشته بتون موجودات گبى هر بر ذرّه و ذرّاتڭ هر بر طائفه‌سى و مخصوص هر بر جماعتى، لسانِ حال ايله «بسم اللّٰه» دير، حركت ايدر.
أوت، گچمش اوچ نقطه سرّيله؛ هر بر ذرّه، مبدأِ حركتنده لسانِ حال ايله (بِسْمِ اللّٰهِ الرَّحْمٰنِ الرَّحٖيمِ) دير. يعنى: «بن، اللّٰهڭ ناميله، حسابيله، إسميله، إذنيله، قوّتيله حركت ايدييورم.» صوڭره نتيجۀِ حركتنده، هر بر مصنوع گبى هر بر ذرّه، هر بر طائفه‌سى، لسانِ حال ايله (اَلْحَمْدُ لِلّٰهِ رَبِّ الْعَالَمٖينَ)
___
(حاشيه): چونكه بِالمشاهده غايت جوّادانه بر فعاليتله شو عالمِ كثيف و سفليده پك كثرتله نورِ حياتى سرپمك و إشعال ايتمك، حتّى أڭ خسيس مادّه‌لرده و تعفّن ايتمش جسملرده كثرتله تازه بر نورِ حياتى ايشيقلانديرمق، او كثيف و خسيس مادّه‌لرى نورِ حياتله لطافتلنديرمك، جلالانديرمق صراحته ياقين إشارت ايدييور كه: غايت لطيف، علوى، نظيف، حياتدار ديگر بر عالمڭ حسابنه شو كثيف، جامد عالمى؛ ذرّاتڭ حركتيله، حياتڭ نوريله جلالانديرييور، أريتييور، گوزللشديرييور. گويا لطيف بر عالمه گيتمك ايچون، زينتلنديرييور. ايشته بشر حشرينى عقلنه صيغيشديره‌ميان طار عقللى آدملر، قرآنڭ نوريله رصد ايتسه‌لر گوره‌جكلر كه: بتون ذرّاتى بر اوردو گبى حشر ايده‌جك قدر محيط بر «قانونِ قيّوميت» گورونويور، بِالمشاهده تصرّف ايدييور.