و گلهجك نسلندهكى إنتظاماته مدار و علم و أمرِ إلٰهينڭ بر عنوانى اولان «إمامِ مبين»ڭ دستورلرى و إملاسى تحتنده و زمانِ حاضر و عالمِ شهادتدن، تشكيل و
______
دفترى، بر مجموعۀِ دساتيريدر. او دساتيرڭ إملاسى ايله و حكمى ايله ذرّات، وجودِ أشيادهكى خدماتنه و حركاتنه سَوق ايديلير.
امّا “كتابِ مبين» ايسه، عالمِ غيبدن زياده، عالمِ شهادته باقار. يعنى، ماضى و مستقبلدن زياده، زمانِ حاضره نظر ايدر و علم و أمردن زياده، قدرت و إرادۀِ إلٰهيهنڭ بر عنوانى، بر دفترى، بر كتابيدر. «إمامِ مبين» قدر دفترى ايسه، «كتابِ مبين» قدرت دفتريدر. يعنى هر شى وجودنده، ماهيتنده و صفات و شئوناتنده كمالِ صنعت و إنتظاملرى گوسترييور كه؛ بر قدرتِ كاملهنڭ دساتيرى ايله و بر إرادۀِ نافذهنڭ قوانينى ايله وجود گيديريلييور. صورتلرى تعيين، تشخيص ايديلوب؛ برر مقدارِ معيّن، برر شكلِ مخصوص ويريلييور. ديمك او قدرت و إرادهنڭ كلّى و عمومى بر مجموعۀِ قوانينى، بر دفترِ أكبرى واردر كه؛ هر بر شيئڭ خصوصى وجودلرى و مخصوص صورتلرى اوڭا گوره بيچيلير، ديكيلير، گيديريلير. ايشته شو دفترڭ وجودى «إمامِ مبين» گبى قدر و جزءِ إختيارى مسائلنده إثبات ايديلمشدر. أهلِ غفلت و ضلالت و فلسفهنڭ أحمقلغنه باق كه: قدرتِ فاطرهنڭ او لوحِ محفوظنى و حكمت و إرادۀِ ربّانيهنڭ او بصيرانه كتابنڭ أشيادهكى جلوهسنى، عكسنى، مثالنى حسّ ايتمشلر. حاشا، «طبيعت» ناميله تسميه ايتمشلر، كورلتمشلر.
ايشته «إمامِ مبين»ڭ إملاسى ايله، يعنى قدرڭ حكميله و دستورى ايله قدرتِ إلٰهيه، ايجادِ أشياده هر برى برر آيت اولان سلسلۀِ موجوداتى، «لوحِ محو إثبات» دينلن زمانڭ صحيفۀِ مثاليهسنده يازييور، ايجاد ايدييور، ذرّاتى تحريك ايدييور. ديمك حركاتِ ذرّات؛ او كتابتدن، او إستنساخدن؛ موجودات عالمِ غيبدن عالمِ شهادته و علمدن قدرته گچمهلرنده بر إهتزازدر، بر حركاتدر. امّا «لوحِ محو إثبات» ايسه، ثابت و دائم اولان لوحِ محفوظِ أعظمڭ دائرۀِ ممكناتده، يعنى موت و حياته، وجود و فنايه دائما مظهر اولان أشياده متبدّل بر دفترى و يازار بوزار بر تختهسيدر كه، حقيقتِ زمان اودر. أوت هر شيئڭ بر حقيقتى اولديغى گبى، زمان ديديگمز، كائناتده جريان ايدن بر نهرِ عظيمڭ حقيقتى دخى «لوحِ محو إثبات»دهكى كتابتِ قدرتڭ صحيفهسى و مركّبى حكمندهدر. (لَا يَعْلَمُ الْغَيْبَ اِلَّا اللّٰهُ)