الحاصل مبارك استاديمزڭ أوصافِ كمالنى و محاسنِ أحوالنى بزم گبى عاجزلرڭ بِحقّ تصوير و تعريف ايدهبيلمسنه إمكان يوقدر. خالقِ ذو الجلال والجمال حضرتلرى، استاديمزى بر وجودِ مستثنا اولارق ياراتمش و توفيقِ إلٰهيهسنه مظهر قيلمشدر. نه سعادت اوڭا كه؛ اونڭ بِالذّات إشتغال ايتديگى و أهمّيتله تشويق و توصيه ايتديگى رسالۀ نور ايله خدمتِ قرآنيه و ايمانيهده بولونه و رسالۀ نوردن درسنى آلمش اوله...
استاديمز مملكتده بولوندقجه، فاصلهسز نشرِ حقائق أيلهمش و بزم سعادتمز ايچون فيض بخش ايدن مبارك نَفَسنى صرف ايتمشدر. جنابِ أرحم الرّاحميندن بتون روح و جانمزله نياز ايدرز كه: «محشر گوننده دخى بزلرى
﴿اَلسَّعٖيدُ سَعٖيدٌ فٖى بَطْنِ اُمِّهٖ﴾
حديثِ شريفنه مظهر اولان استاديمز دفينۀِ علوم و فنون، بديع البيان علاّمۀِ بديع الزمان سعيد النورسى حضرتلرى ايله برلكده حشر ايتسين. تا كه، او قورقولى گونده نورلى، مشفق، مبارك أليله ألمزى طوتسون، حضورِ رسولِ أكرم عليه الصلاة والسلامه بزى گوتورسون، إن شاء اللّٰه!...»
رسالۀ نور شاكردلرندن
فيضى، أمين
* * *
آيت الكبرا حقّنده بر قاچ سوز
بديع الزمان حضرتلرى قسطمونيده ايكن، آيت الكبرا ناميله، جنابِ حقّڭ وارلغنى، برلگنى، كائناتدهكى موجوداتڭ لسانلريله إثبات ايدن معظّم بر رساله يازمشدر.