إخباراتى نوعندن، قرآنِ معجز البيانڭ دخى بو زمانده بر معجزۀِ معنويهسى اولان رسالۀِ نوره نظرِ دقّتى جلب ايتمهسى معناىِ إشارى طبقهسندن رمز و ايمالرى، إعجازينڭ شأنندندر و او لسانِ غيبينڭ بلاغتِ معجزهكارانهسنڭ مقتضاسيدر.
أوت أسكيشهر حپسخانهسنده دهشتلى بر زمانده، قدسى بر تسلّىيه پك چوق محتاج اولديغمز هنگامده، معنوى بر إخطارله: «رسالۀ نورڭ مقبوليتنه دائر أسكى أوليالردن شاهد گوسترييورسڭ. حالبوكه
﴿وَلَا رَطْبٍ وَلَا يَابِسٍ اِلَّا فٖى كِتَابٍ مُبٖينٍ﴾
سرّيله أڭ زياده بو مسئلهده سوز صاحبى قرآندر. عجبا رسالۀِ نورى قرآن قبول ايدر مى؟ اوڭا نه نظرله باقييور؟» دينيلدى. او عجيب سؤال قارشيسنده بولوندم. بن ده قرآندن إستمداد أيلدم. بردن اوتوز اوچ آيتڭ معناىِ صريحنڭ تفرّعاتى نوعندهكى طبقاتندن معناىِ إشارى طبقهسنده و او معناىِ إشارى كلّيتنده داخل بر فردى رسالۀِ نور اولديغنى و دخولنه و مدارِ إمتيازينه بر قوّتلى قرينه بولونديغنى بر ساعت ظرفنده حسّ ايتدم. و بر قسمنى بر درجه ايضاحلى، بر قسمنى مجملاً گوردم. قناعتمده هيچ بر شكّ و شبهه و وهم و وسوسه قالمادى.
بن ده أهلِ ايمانڭ ايماننى رسالۀِ نورله محافظه نيّتيله او قطعى قناعتمى يازدم و خاص قارداشلريمه محرم طوتولمق شرطيله ويردم. و او رسالهده بز ديمييورز كه؛ آيتڭ معناىِ صريحى بودر، تا خواجهلر (فٖيهِ نَظَرٌ) ديسين. هم ديمهمشز كه، معناىِ إشارينڭ كلّيتى بودر. بلكه دييورز كه:
معناىِ صريحنڭ تحتنده متعدّد طبقهلر وار. بر طبقهسى ده معناىِ إشارى و رمزيدر و او معناىِ إشارى ده بر كلّيدر. هر عصرده جزئياتلرى وار. رسالۀِ نور دخى بو عصرده او معناىِ إشارى طبقهسنڭ كلّيتنده بر فرديدر و او فردڭ قصدًا بر مدارِ نظر اولديغنه و أهمّيتلى بر وظيفه گورهجگنه، أسكيدن بَرى علما مابيْننده جارى بر