خارقه صداقتلرى و فوق العاده متانتلريدر. بو متانتڭ برنجى سببى: قوّتِ ايمانيه و إخلاص خصلتيدر. ايكنجى سببى: جسارتِ فطريهدر.» اونلره: «سز جسارتله و أفهلكله طانينمشسڭز و دنيايه عائد أهمّيتسز شيلر ايچون فداكارلق گوسترسهڭز، ألبته رسالۀ نورڭ قدسى خدمتنده، جهانه دگر اُخروى نتيجهلرينه مقابل، مردانه و فداكارانه جسارت گوستروب صداقتڭزى محافظه ايدرسڭز.» ديدم. اونلر ده تام قبول ايتديلر.
سعيد النورسى
* * *
﴿بِاسْمِهٖ سُبْحَانَهُ﴾
عالمِ إنسانيتده و إسلاميتده اوچ معظّم مسئله اولان ايمان و شريعت و حياتدر. ايچلرنده أڭ معظّمى ايمان حقيقتلرى اولديغندن بو حقائقِ ايمانيۀِ قرآنيه باشقه جريانلره، باشقه قوّتلره تابع و آلَت ايديلمهمك و ألماس گبى او قرآنڭ حقيقتلرينى، دينى دنيايه صاتان ويا آلَت ايدن آدملرڭ نظرنده جام پارچهلرينه اينديرمهمك و أڭ قدسى و أڭ بيوك وظيفه اولان ايمانى قورتارمق خدمتنى تام يرينه گتيرمك ايچون، رسالۀِ نورڭ خاص و صادق طلبهلرى، غايت شدّت و نفرتله سياستدن قاچييورلر. حتّى سزڭ بو قارداشڭز (سز ده بيليرسڭز) بو اون سكز سنهدر، او قدر محتاج اولديغم حالده سياسته، حياتِ إجتماعيهيه تماس ايتمهمك ايچون، حكومته قارشى بر تك مراجعتم اولماديغى گبى، بو سكز طوقوز آيدر كُرۀِ أرضڭ بو هرج و مرجنى بر تك دفعه نه سؤال و نه ده مراق ايتدم.
سعيد النورسى
* * *