﴿بِاسْمِهٖ سُبْحَانَهُ﴾
عزيز قارداشلرم!
حقائقِ ايمانيه، هر شيدن أوّل بو زمانده أڭ برنجى مقصد اولمق و سائر شيلر ايكنجى، اوچنجى، دردنجى درجهده قالمق و رسالۀِ نورله اونلره خدمت ايتمك أڭ برنجى وظيفه، مدارِ مراق و مقصودِ بِالذّات اولمق لازم ايكن؛ شيمديكى حالِ عالم حياتِ دنيويهيى خصوصًا حياتِ إجتماعيهيى و بِالخاصّه حياتِ سياسيهيى و بِالخاصّه مدنيتڭ سفاهت و ضلالتنه جزا اولارق گلن غضبِ إلٰهينڭ بر جلوهسى اولان حربِ عمومينڭ طرفگيرانه، طمارلرى و أعصابلرى تهييج ايدوب باطنِ قلبه قدر، حتّى حقائقِ ايمانيهنڭ ألماسلرى درجهسنه او ضررلى، فانى آرزولرى يرلشديرهجك درجهده بو مشئوم عصر اويله شيرينغه ايتمش و ايدييور و اويله آشيلامش و آشيلييور كه؛ رسالۀِ نور دائرهسى خارجنده بولونان بر قسم سطحى بلكه ده بر قسم ضعيف وليلر؛ او سياسى و إجتماعى حياتڭ رابطهلرى سببيله، حقائقِ ايمانيهنڭ حكمنى ايكنجى، اوچنجى درجهده بيراقوب، او جريانلرڭ حكمنه تابع اولارق همفكر اولان منافقلرى سَور، كندينه مخالف اولان أهلِ حقيقتى بلكه أهلِ ولايتى تنقيد و عداوت ايدر، حتّى حسّياتِ دينيهيى او جريانلره تابع ياپارلر.
ايشته بو عصرڭ بو عجيب تهلكهسنه قارشى، رسالۀ نورڭ خدمت و مشغلهسى، شيمديكى سياستى و جريانلرينى او درجه نظرمدن إسقاط ايتمش كه؛ بو حربِ عمومىيى درت آيدر مراق ايتمدم، صورمادم.
هم رسالۀِ نورڭ خاص طلبهلرى، باقى ألماسلر حكمنده اولان حقائقِ ايمانيهنڭ وظيفهسى ايچنده ايكن، ظالملرڭ سطرنج اويونلرينه باقمقله وظيفۀِ قدسيهلرينه فتور ويرمهمك و فكرلرينى بولاشديرمامق گركدر.