﴿بِاسْمِهٖ سُبْحَانَهُ﴾
بو سنهكى رمضانِ شريف هم عالمِ إسلام ايچون، هم رسالۀِ نور شاكردلرى ايچون غايت أهمّيتلى و پك چوق قيمتليدر. رسالۀِ نور شاكردلرينڭ إشتراكِ أعمالِ اُخرويه دستورِ أساسيهلرى سرّنجه، هر بريسنڭ قزانديغى مقدار، قارداشلرينه عين مقدار دفترِ أعمالنه گچمهسى او دستورڭ و رحمتِ إلٰهيهنڭ مقتضاسى اولمق حيثيتيله، رسالۀِ نورڭ دائرهسنه صدق و إخلاص ايله گيرنلرڭ قزانجلرى پك عظيم و كلّيدر. هر برى، بيڭلر حصّه آلير. إن شاء اللّٰه أموالِ دنيويهنڭ إشتراكى گبى إنقسام و تجزّى ايتمهدن هر بريسنڭ دفترِ عملنه عينى گچمهسى؛ بر آدمڭ گتيرديگى بر لامبا، بيڭلر آيينهلرڭ هر بريسنه عين لامبا إنقسام ايتمهدن گيرمهسى گبيدر. ديمك رسالۀِ نورڭ صادق شاكردلرندن بريسى، ليلۀِ قدرڭ حقيقتنى و رمضانڭ يوكسك مرتبهسنى قزانسه، عموم حقيقى صادق شاكردلر صاحب و حصّهدار اولمق، وسعتِ رحمتِ إلٰهيهدن چوق قوّتلى اميدوارز.
سعيد النورسى
* * *
﴿بِاسْمِهٖ سُبْحَانَهُ﴾
برنجى مسئله:
قارداشلريمزدن بريسنڭ نماز تسبيحاتنده تكاسل گوسترمسنه بناءً ديدم: نمازدن صوڭرهكى تسبيحاتلر، طريقتِ محمّديهدر (عصم) و ولايتِ أحمديهنڭ (عصم) بر أوراديدر. او نقطهدن أهمّيتى بيوكدر. صوڭره، بو كلمهنڭ حقيقتى بويله إنكشاف ايتدى: ناصلكه رسالته إنقلاب ايدن ولايتِ أحمديه بتون ولايتلرڭ فوقندهدر؛ اويله ده، او ولايتڭ طريقتى و او ولايتِ كبرانڭ