طاغيتيلاجق.. ئولمگه يوز طوتمش ظن ايديلن ايمان روحى يڭيدن جانلاناجق.. جانلره جان قاتاجق.. معنًا ئولمگه يوز طوتان ملّتِ إسلاميهيى إحيا ايدهجك.. عالمه أفندى اولان إسلاميتڭ (بِإذْنِ اللّٰه) جهانه أفنديلگنڭ مادّى معنوى مبشّرى اولاجقدى.
ايشته، بو قدسى حقيقتڭ حاملى و ناشرى اولان و حقيقتده بوگونكى بشريتڭ مدارِ إفتخارى بولونان بو عزيز ذات، دين دشمنلرينڭ پلانيله (وقتيله) بو بلدهيه گوندريلمش، آناطوليده تأسيس ايتديريلن رژيمڭ عليهنده بولونماسنه، فعلى مداخلهسنه ممانعت اولونمشدى. هيهات! أساسًا كنديسى سياستدن چكيلمشدى؛ أهلِ دنيانڭ دنياسنه قاريشمييوردى. او، إستقبالى نورلانديراجق بر حقيقتڭ تأليف و نشرينه چاليشييوردى. كائناتڭ صاحبى و حادثهلرڭ متصرّفى اولان اللّٰه؛ اونڭ حاميسى، معينى و يارديمجيسى ايدى.
ايشته اوتوز سنه صوڭره تكرار بارلايه دونديگى زمان، خدمتِ ايمانيهسنده نائل اولديغى بيوك إكراملرى، عنايتلرى دوشونهرك، مشاهده ايدهرك مسرور اولدى و سرورندن آغلايوردى، سجدۀ شكرانه وارييوردى.
حالِ حاضرده استاد إسپارطهده إقامت ايدر. بعضًا أميرطاغنه، بعضًا بارلايه گيدر. بورالرى، رسالۀِ نورڭ تأليف و إنكشاف مركزلرى اولديغى ايچون روحًا چوق علاقهداردر. هم كنديسى طقسان ياشنه ياقلاشديغى و بر چوق دفعهلر زهرلنديگى ايچون، راحتسزدر. خستهلغى تعريف ايديلميهجك درجهده آغيردر و شدّتليدر. روحًا، حسّياتى قوّتلى؛ و عالم، باخصوص عالمِ إسلام، بِالخاصّه رسالۀِ نور دائرهسى، وجودِ معنويسى حكمنده اولديغندن، هر ايكى وجودندهكى إضطراب شديددر. گرچه طلبهلرينڭ دعالرى و نشرِ أنوارِ ايمانيه او إضطرابنه بر مرهم و دوا ايسه ده، ينه ده پك واسع شفقتى إعتباريله زمان زمان إضطرابى شدّتلنمكدهدر. بو