درعهده ايتمهلرى، بو خصوصده بيوك فداكارلق گوسترمهلرى ايسه؛ بو ملّت و وطن ايچون بيوك بر سعادت اولدى. چونكه هيچ بر شخصى منفعت طلب ايتمهدن و يالڭز رضاىِ إلٰهى ايچون حركت ايتمهلرى؛ اونلرڭ، بو أصيل ملّتڭ حقيقى أولادلرى اولديغنى گوستردى.
استادڭ بارلايه گيديشى
استاد، بارلادن يگرمى سنه أوّل آيريلمش و او زمانه قدر هيچ گيتمهمشدى. بارلا ايله، كندى نورس كويندن زياده علاقهداردى. چونكه، حياتِ معنويهسى اولان رسالۀِ نور بوراده تأليف ايديلمگه باشلامشدى. قرآنِ حكيمڭ هدايت نورلرينى تمثيل ايدن «سوزلر» و «مكتوبات» و «لمعاتِ نوريه» بورادن أطرافه ياييلمشدى. بو إعتبارله بارلا، رسالۀ نور درسخانهسنڭ ايلك مركزى ايدى.
بارلادهكى حياتى گرچه نفى و إنزوا ايچنده و ترصّد آلتنده گچمكله آجى ايدى؛ فقط رسالۀِ نور حقيقتلرينڭ تأليف يرى اولديغندن استادڭ أڭ طاتلى و شيرين حياتى ده ينه بارلا حياتيدر دينيلهبيلير. بو دفعه بارلايه نفى ايله دگل، حپس ايله دگل، كندى رضاسى ايله و سربست اولارق گيدييوردى. گوزل بر بهار گونى بارلايه گلدى. بارلادهكى طلبهلرينڭ مهمّ بر قسمى استادى قارشيلاديلر. استاد، سكز سنهلك إقامتگاهى اولان مدرسۀِ نوريهسنه ياقلاشيركن كندينى طوتامدى، مبارك گوزلرندن ياشلر بوشاندى. حشمتلى چنار آغاجى ده عادتا كنديسنى سلاملايوردى. بر وقتلر، يعنى بارلاده سكز سنه إقامتدن صوڭره إسپارطهيه جلب ايديلمشدى. او زمانكى گيديشنده مبارك چنار آغاجى استادى معنًا تشجيع ايتمش، حشمتلى قنادلرى اولان داللرينڭ جنابِ حقّه اولان سجدهوارى عبوديتيله