أهلِ ايمانڭ قلبلرينه سرورلر گتيرهرك فوق العاده إنكشافى، خدمتنه مأمور قيلنديغڭز و بِالفعل موفّق اولديغڭز قدسى دعوا و خدمتڭزڭ نه قدر يوكسك و پارلاق اولديغنى، گونش گبى إثبات ايدييور.
يگرمىبش اوتوز سنهدن بَرى بتون مانعلره و صيقنتيلره رغمًا بو قدر صبر و متانتڭز و قرآندن قلبِ منوّريڭزه گلن رسالۀِ نورڭ نشرى جهتنده بو خارقه خدمت و مجاهدهلريڭز، إستقبالڭ نسللرينه و إسلامڭ قهرمان مجاهدلرينه بر نمونۀِ إقتدا و إمتثال اولويور. قرآن گونشنڭ سونمهين نورلرى و أبدى لمعهلرى اولان نور شعاعلريله جهل و ضلالت قراڭلقلرينى إزاله ايدهرك، ميليونلر قلبلرى او نورله نورلانديروب، أهلِ ايمانى كنديڭزه منّتدار ايتديڭز. بو وطن و بو ملّت، بو تاريخ و بو طوپراق، سزڭ بو خدمتڭزى، بو فداكارلغڭزى هيچ بر زمان اونوتميهجقدر. أبديت عالمنه گوچ أيلديگڭزده دخى، سزڭ بو خدمتڭز بر چكردك اولوب، اوندن فيشقيران بر شجرۀِ عاليه هر طرفى قاپلايهجق و او نور آغاجنڭ أطرافنه طوپلانان بيوك جماعتلر و رسالۀِ نورڭ يوكسهلن أبدى شعاعلرى، او خدمتڭزى إلَى الأبد و داها پارلاق و داها شعشعهلى إدامه ايدهجكلر.
سز، رسالۀ نورڭ ترجمانى حيثيتيله و بو ايمان خدمتڭزڭ إسلام اُفقلرنده پارلاماسى جهتيله، بو عصرڭ بر هدايت سرداريسڭز.
قرآنِ كريمڭ اون دردنجى عصرِ محمّديدهكى (عصم) عزيز دلاّلى و او مدهش زمانڭ مدهش ظلماتنه قارشى نورِ قرآنله مقابله ايدن بيوك فداكارى و رسالۀِ نورڭ يوز بيڭلر نسخهلرينى يوز بيڭلر طلبهلرينڭ قلملريله هر طرفده نشر ايدوب دينسزلگه و كفرِ مطلقه قارشى بر سدِّ قرآنى تأسيس ايدن محتشم قهرمان سَوْگيلى استاديمز!