حاكم اولان قانونِ إلٰهىيى دوشونميهرك، هر مسئلهنڭ ايستديگى وقتده حلّ اولنماسنى ايستهيور؛ كوچك دائرهلردهكى وظيفهلرينى آتلايوب، بيوك دائرهلره صاپييور.
تخملرى آتيلمش و سنبل وقتنه گلمش اولان رسالۀ نورڭ يتيشديرديگى حقيقى ايمانلى ذاتلر، إن شاء اللّٰه ياقين زمانده عالمِ إسلامه برر نمونۀ إمتثال اولوب نورِ هدايتى گوسترهجكلردر.
آنقره اونورسيتهسى نور طلبهلرى نامنه
عبد اللّٰه
* * *
آنقرهده نورلرى نشر ايتمك نعمتِ عظماسنه نائل اولمش بيوك بر عالم و أهلِ قلب بر ذاتڭ استاده يازديغى بر مكتوبدر:
صاحب الإخلاص والنّور والكمال والإرشاد مجاهدِ أكبر بديع الزمان حضرتلرى!
ميدانِ إبتلا و إمتحانه ِﷲ و فِى اللّٰه ايچون آتيلديغڭز آندن بو آنا قدر حقوق اللّٰه و حقوقِ عبادڭ مدافعه و محافظهسنه ليل و نهار، حق و خلق حضورنده، ذاتڭزه خاص قدرتِ علميه و كماليه و نوريه و إرشاديهلريڭزله فوق العاده آغير شرائط دائرهسنده لا ينقطع دينهجك درجه سعى و غيرت و همّتله چاليشديغڭزه؛ مَلك، فلك، عرش، كرسى، لوح، قلم، أرض، سماوات، عالمِ كون، إنس و جنّ و خارجدهكى أهلِ إنسان و إسلام و بو عبدِ عاجز «اَشْهَدُ بِاللّٰه إلى آخر الدَّوران» شاهدِ دائمى و أبدىيز.