ديكتاتورلر و شفلر إدارهسنده مملكتڭ ديننى، ايماننى، جاننى، حياتنى قاصوب قاووران مرحمتسز أسكى دورڭ فارماصون قوللرينڭ شو جان چكيشمه دورنده دموقراتلره توجيه ايتدكلرى سلاحلرڭ أڭ تأثيرليسى، اونى كنديلرندن داها دينسز گوسترمگه چاليشمالريدر. بر قسمى ديندارلق پردهسنه بورونهرك، دموقراتلرڭ ملّته وعد ايتدكلرى دين حرّيتنى تأمين ايتميهجكلرينى پروپاغنده ايدييورلر. بر قسمى ده، إرتجاعى حمايه ايدييور إتهاميله دموقراتلرڭ دين حرّيتنه طرفدارلق ايتمهسنى اوڭلهمگه؛ كنديلرى گبى دموقراتلرى ده دينى، دين مؤسّسهلرينى تخريب ايتمگه، دين أهلنه قارشى شدّت گوسترمگه سَوق ايدييورلر.
دموقرات پارتينڭ إقتدارى أله آلير آلماز قومونيستلره قارشى شدّتلى طاورانماسى، ديگر طرفدن أذانِ محمّدينڭ سربستيسنى تأمين ايتمهسى، بو سببله خلقڭ محبّتنى قزانهرق كندى قوّتندن يگرمى دفعه داها بر قوّت ألده ايتمهسى خلقجيلرى مدهش أنديشهيه دوشوردى.
أسكى دورڭ دين أهلنه و قرآن أهلى اولان نورجيلره قارشى تعقيب ايتديگى ظالمانه سياستڭ اونلرى بو حاله دوشورديگنى دموقراتلر إدراك ايدهجك بر سويهده اولدقلرى ايچون، اونلرڭ پوصولرينه دوشميهجكلرينه إعتماديمز واردر.
أسكى دورڭ بللى باشلى شعارى معلومدر. دموقراتلر، بقالرينى تأمين ايتمك ايسترلرسه، تماميله بو شعاره قارشى بر سياست تعقيب ايتمهلرى ايجاب ايدر؛ بر طرفدن قومونيزمه قارشى شدّت، ديگر طرفدن دينى و دين أهلنى حمايه. آچيقجه و مردجه بو يولده يورومك مجبوريتندهدر. بو خصوصده گوسترهجگى أڭ اوفاق بر ضعف، ياخود أڭ اوفاق بر صميميتسزلك، اونى خلقجيلرڭ چوقورينه دوشورور.