شيمدى عدنان مندرس گبى، «إسلاميتڭ و دينڭ ايجابلرينى يرينه گتيرهجگز» دييه و مذكور ايكى قانونِ أساسيهيه قارشى مخالفت ايدوب تام ضدّينه اولارق ايكى دهشتلى جريان، غايت بيوك رشوت ايله خلقلرى آلداتمق و أجنبيلرڭ مداخلهسنه يول آچمق وضعيتنده هجوم ايتمك إحتمالى قوّتليدر.
بريسى: برنجى قانونِ أساسىيه مخالف اولارق، بر جانى يوزندن قرق معصومى كسمش، بر كويى ده ياقمش. بو درجهده بر إستبدادِ مطلق، هر نفسڭ ذوقنه گچهجك مأموريته بر حاكميت صورتنده رشوت ويرهرك، ديندار حرّيتپرورلره هجوم ايديلييور.
ايكنجى هجوم ده: إسلاميت ملّيتِ قدسيهسنى بيراقوب (أوّلكيسى گبى) بر جانى يوزندن يوز معصومڭ حقّنى چيگنهيهبيلن، ظاهرًا بر ملّيتجيلك و حقيقتده عرقجيلق طماريله هم حرّيتپرور ديندار دموقراتلره، هم بتون بو وطندهكى يوزده يتمشى سائر عنصرلردن بولونانلره، هم حكومت عليهنه، هم بيچاره توركلر عليهنه، هم دموقراتڭ تعقيب ايتديگى سياست عليهنه چاليشهرق و سرسرى و أنانيتلى نفسلره غايت ذوقلى بر رشوت اولارق بر عرقجيلق قارداشلغى ويرييور. او ذوقلى قارداشلغڭ ايچنده، او ذوقلى فائدهدن بيڭ دفعه داها زياده حقيقى قارداشلرى دشمنلغه چويرمك گبى عجيب تهلكهيى، او سرخوشلغى ايله حسّ ايدهمييور. مثلا: إسلاميت ملّيتى ايله درت يوز ميليون حقيقى قارداشڭ هر گون
﴿اَللّٰهُمَّ اغْفِرْ لِلْمُؤْمِنٖينَ وَالْمُؤْمِنَاتِ﴾
دعاىِ عموميسيله معنوى يارديم گورمك يرينه، عرقجيلق درت يوز ميليون مبارك قارداشلرى، درت يوز سرسرىيه و لااباليلره يالڭز دنيوى و پك جزئى بر منفعتى ايچون ترك ايتديرييور. بو تهلكه هم بو وطنه، هم حكومته، هم ده ديندار دموقراتلره و توركلره بيوك بر تهلكهدر و اويله ياپانلر ده حقيقى تورك دگللردر. نجيب توركلر بويله خطادن چكينيرلر.