خدمتنى حياتلرينڭ غايهسى عدّ ايدن و بو خدمتله وطن، ملّت و إسلاميته أڭ بيوك فائدهيى تأمين ايدن طلبهلر ميدانه چيقهرق خدمته باشلاديلر.
* * *
آفيون محكمهسنڭ رسالۀِ نورى مصادره قرارينى، محكمۀِ تمييز أساسدن بوزدى. بوزما قرارنده ايلرى سورديگى سببلردن بريسى: قرارنامهده صوچ عنصرى گوستريلن رسالهلرڭ، دڭزلى آغير جزا محكمهسنده برائت ايدن أثرلردن اولوب اولماديغنڭ ذكر ايديلمديگى؛ شايد برائت ايدوب إعاده ايديلن أثرلردن ايسه، قرارڭ ياڭليش اولاجغى؛ هم تمييزڭ تصديقندن گچوب قضيۀ محكمه حالنه گلن بر دعوانڭ يڭيدن تحتِ محاكمهيه آلينشنڭ قانونه اويغونسز اولديغيدر.
تمييزڭ بوزما قرارندن صوڭره آفيونده تكرار دوروشمه باشلادى. بو شكلده محكمه دوام ايدركن إقتدارى أله آلان دموقرات پارتى حكومتى، عمومى عفو إعلان ايتدى. آفيون محكمهسى ده عفو قانوننڭ دائرۀِ شمولنه گيرديگى ايچون دوسيه اورتهدن قالديريلدى. (حاشيه)
* * *
___
(حاشيه): فقط محكمه هيئتى، رسالۀِ نور أثرلرينڭ برائتنه قرار ويرمدى، مصادرهسنه قرار ويردى. بو قرار ١٩٥٦ تاريخنه قدر دوام ايتدى. محكمه ايكى دفعه نور رسالهلرينه مصادره قرارى ويردى. تمييز محكمهسى بو ايكى قرارى ده بوزدى. آفيون محكمهسى تمييزڭ قرارينه اويارق، نورلرڭ برائتنه قرار ويردى. بو سفر تمييز، اصولده نقصانلق يوزندن بوزدى و أثرلرڭ ديانت ايشلرنجه تدقيقنى ايستدى. ديانت ايشلرى مشاوره قورولنجه بتون أثرلر تدقيق ايتديريلدى. نتيجهده نورلرڭ حقيقتنى بر درجه بليرتن بر راپور ويريلدى.
أهلِ وقوفڭ مذكور راپورينه إستنادًا آفيون محكمهسى، حزيران ١٩٥٦ تاريخنده إتّفاقله نورلرڭ برائتنه و سربستيتنه قرار ويردى. قرار قطعيلشدى. آرتيق بو تاريخدن صوڭره، مركزِ حكومتده رسالۀِ نور مجموعهلرى مطبعهلرده طبع ايديلمگه باشلادى.