بر وجهِ رحمت شو ايدى: محكمه گونلرنده مختلف ولايت و قضالردن گلن نور طلبهلرى بربريله طانيشارق؛ هم استاد، هم رسالۀِ نور، هم خدمتِ نوريه خصوصنده معلومات صاحبى اولورلر؛ و اُخروى و ايمانى اولان و رضاىِ إلٰهى اوغرندهكى نوردن قوپوب گلن صميمى بر اخوّت ايله بر قوّۀِ معنويه ألده ايدرلردى. محكمه گونلرى استاد و طلبهلرينڭ قهرمانلر قافلهسى اولارق صف حالنده محكمهيه گليشلرى، مؤمنلرڭ قلبلرنده اللّٰه ايچون صوڭسز بر محبّت و ياقينلغه وسيله اولويوردى. بو محكمهلر، ايمان و إسلام دعواسنه خدمت ايچون مدارِ تشويق حكمنه گچيوردى. دين دشمنلرينڭ رغمنه اولارق بو مصيبت، رسالۀِ نور خدمتِ ايمانيهسنى درعهده ايدهجك و اونڭله غايۀِ حيات ايدهجك فداكارلرى، قهرمانلرى نتيجه ويردى. يڭى و منوّر نور طلبهلرى ميدانه چيقديلر. حپسدن تخليهدن صوڭره، استادڭ أوينڭ قپوسى اوڭنده بر ايكى پوليس دائمى نوبت بكلر و ياننه كيمسهيى صوقمازلردى. ذاتًا حپس مدّتنجه خلقه دهشت ويرهجك شكلده يالان ياڭليش پروپاغندهلرله، بديع الزمانڭ إمحا ايديلهجگى گبى خبرلر أطرافه يايديريلمشدى.
استاد، آفيونده ايكى آى قدر إقامتدن صوڭره أميرطاغنه گلدى. أميرطاغنده بر چوق رسالۀ نور طلبهلرى واردى. اورادهكى خدمتِ نوريهيى بو طلبهلر ايفا ايتديلر.
آفيون حپسندن صوڭره خدمتِ نوريه ناصل جريان ايتدى؟
إسپارطهده تكثير ماكينهسيله نور مجموعهلرينڭ نشرينه دوام ايديلييوردى. استاد، ينه عادتى وجهله تصحيحات ايله مشغولدى. يالڭز حپسدن صوڭره خدمتِ نوريه بر قاچ قسمه إنقسام ايتمشدى؛ يالڭز تكثير ايله و أل يازيسى ايله نشره منحصر اولمايوردى. بو زمانلردهكى خدمت صفحهلرى شو صورتله إفاده اولونهبيلير: