بديع الزمانڭ إستانبولده حياتى، بر درجه سياسيدر. سياست يوليله إسلاميته خدمت ايديلهجك، دييه قناعت بسلهيوردى. سياسى حياته قاريشماسى، إسلاميته خدمت عشقنڭ بر نتيجهسى ايدى. دائما حرّيت طرفدارى ايدى. گورديگى حقسزلقلردن طولايى ژون توركلره دائما مخالفتده بولونهرق:
- سز دينى اينجيتديڭز، غيرت اللّٰهه طوقونديڭز، شريعتى تزييف ايتديڭز؛ نتيجهسى وخيم اولاجقدر، دييه إظهارِ مخالفتدن چكينمييوردى.
حرّيتدن صوڭره مجاهد آرقداشلريله برابر إتّحادِ محمّدى (عصم) جمعيتنى قورمشلر، جمعيت پك قيصه بر زمانده إنكشافه باشلامش، حتّى بديع الزمانڭ بر مقالهسيله آطهپازارى و إزميت حواليسنده أللى بيڭ كيشى جمعيته داخل اولمشدى.
حرّيتى سوءِ تفسير ايتمهمك و مشروطيتى مشروطيتِ مشروعه اولارق قبول ايتمك لازم گلديگنى ايلرى سورهرك بو خصوصده دينى غزتهلرده مقالهلر نشر ايدييور و خطابهلرده بولونويوردى. بو مقاله و خطابهلرى، أمثالسز دينهجك قدر بليغ و مقنع ايدى. أهلِ علم و أهلِ سياست، سعيد نورسىنڭ بو يازيلرندن و درسلرندن چوق إستفاده ايتمشلردر. او زماندهكى إنتباهِ ملّىيى، آناطولى و آسيانڭ سعادتِ دنيويهسنڭ فجرِ صادقى اولارق مژده ويرييور، فقط ألدن قاچمامسى ايچون أوامرِ شرعيهيى چابوق إمتثال ايتمهنڭ ضرورى اولديغنى ايلرى سورويوردى. «أگر مشروطيتى حرّيتِ شرعيه ايله قبول ايتمزسهك و اويله تطبيق ايديلمزسه، ألمزدن قاچهجق، مستبد بر إدارهيه يرينى ترك ايدهجك» دييه إخطار ايدييوردى. او نطق و مقالهلردن نمونه اولارق جزئى بر قسمنى بورايه درج ايدييورز: