- بونلرده حياتِ إجتماعيهيه مالكيت و فوق العاده وظيفهشناسلق و چاليشمه بولونديغنى مشاهده ايتديگم ايچون جمهوريتپرورلكلرينه مكافاةً كنديلرينه معاونت ايتمك ايستهيورم، جوابنده بولونمشدر... (حاشيه) تيللوده ايكن، بر گيجه شيخ عبد القادرِ گيلانى (قس) حضرتلرينى رؤياسنده گورور. گيلانى حضرتلرى (قس) كنديسنه خطابًا:
- ملا سعيد! ميران عشيرتى رئيسى مصطفى پاشايه گيديڭز و كنديسنى طريقِ هدايته دعوت ايديڭز. ياپديغى ظلمدن واز گچهرك نمازه و أمرِ معروفه مداوم اولماسنى توصيه ايديڭز. عكسى تقديرده ئولديريڭز.
ملا سعيد، بو رؤيايى گورور گورمز، همان تداركنى ياپارق ميران عشيرتنه طوغرى تيللودن حركت ايدر، طوغريجه مصطفى پاشانڭ چاديرينه گيرر. پاشا اوراده بولونماديغندن، برآز إستراحت ايدر. صوڭره مصطفى پاشا ايچرى گيرر. اوراده حاضر اولانلرڭ هپسى قيام ايتدكلرى حالده ملا سعيد يرندن بيله قيميلدانمز.
___
(حاشيه): ١٩٣٥ ده أسكيشهر آغير جزا محكمهسنده «جمهوريت حقّنده فكرڭ نهدر؟» سؤالنه جوابًا:
- أسكيشهر محكمه رئيسندن باشقه داها سزلر دنيايه گلمهدن بنم ديندار بر جمهوريتجى اولديغمى ألڭزدهكى تاريخچۀِ حياتم إثبات ايدر، دييهرك يوقاريده ذكر ايديلن «قارينجه حادثهسنى» آڭلاتير و شويله دير:
- خلفاىِ راشدين هر برى هم خليفه، هم رئيسِ جمهور ايدى. صدّيقِ أكبر، عشرۀِ مبشّرهيه و صحابۀِ كرامه ألبته رئيسِ جمهور حكمنده ايدى. فقط معناسز إسم و رسم دگل، بلكه حقيقتِ عدالتى و حرّيتِ شرعيهيى طاشييان معناىِ ديندار جمهوريتڭ رئيسلرى ايديلر.