قسم طلبهلريله او قازاقلره قارشى قويمش و هپسنڭ قورتولماسنى صاغلامشدر. حتّى هجوم ايدن قازاقلره دهشت ويرمك ايچون، گيجهلين اونلرڭ اوستندهكى يوكسك بر تپهيه هجوم طرزنده چيقييور، گويا بيوك بر إمداد قوّتى گلمش ظن ايتديرهرك، قازاقلرى اويالايوب ايلرلتمييوردى. بويلهلكله، واسطانڭ روس إستيلاسندن قورتولمسنه سبب اولمشدر.
او محاربه زمانلرنده سپره دونديگى وقت، قيمتدار طلبهسى ملا حبيب ايله «إشارات الإعجاز» نامندهكى تفسيرينى تأليف ايدييوردى. بعضًا آوجى خطّنده، بعضًا آت اوزرنده، بعضًا ده سپره گيردكلرى زمان؛ كنديسى سويلهيور، ملا حبيب ده يازييوردى. «إشارات الإعجاز»ڭ بيوك بر قسمى بو وضعيتده تأليف ايديلمشدر. (حاشيه)
بو خارقه تفسيرڭ باشندهكى «إفادۀ مرام»ى تفسير حقّنده بر درجه معلومات ويرمهسى إعتباريله عينًا درج ايدييورز.
___
(حاشيه): تنبيه: بو «إشارات الإعجاز» تفسيرى، أسكى حربِ عمومينڭ برنجى سنهسنده، جبهۀِ حربده، مأخذسز اولارق، كتاب موجود اولماديغى حالده تأليف ايديلمشدر. حرب زماننڭ ضرورتندن باشقه، درت سببه بناءً غايت مختصر و ايجازلى بر طرزده يازيلمش؛ «فاتحه» و نصفِ أوّل داها مجمل، داها مختصر قالمشدر.
أوّلا: او زمان، ايضاحه مساعده ايتمييوردى. أسكى سعيد، ايجازلى و قيصه تعبيراتله إفادۀ مرام ايدييوردى.
ثانيًا: غايت ذكى اولان كندى طلبهلرينڭ درجۀ فهملرينى دوشونويوردى؛ باشقهلرڭ آڭلامالرينى دوشونمييوردى.
ثالثًا: أسكى سعيد، أڭ دقيق و أڭ اينجه اولان نظمِ قرآنده ايجازلى اولان إعجازى بيان ايتديگى ايچون، قيصه و اينجه دوشمشدر. فقط شيمدى ايسه يڭى سعيد نظريله مطالعه ايتدم. الحقّ، أسكى سعيدڭ بتون خطيئاتيله برابر، شو تفسيردهكى تدقيقاتِ علميهسى، اونڭ