عقليه ايله إثبات ايدن، مژده ويرن چوق قيمتدار، بتون مسلمانلره، حتّى إنسانلغه شامل بر درسدر، بر خطبهدر.
خطبۀ شاميهنڭ باش طرفلرنده دييور:
بن بو زمان و زمينده، بشرڭ حياتِ إجتماعيه مدرسهسنده درس آلدم و بيلدم كه: أجنبيلر، آوروپاليلر ترقّيده إستقباله اوچمالريله برابر بزى مادّى جهتده قرونِ وسطاده طورديران و توقيف ايدن آلتى دانه خستهلقدر. او خستهلقلر ده بونلردر:
١ - يأسڭ، اميدسزلگڭ ايچمزده حيات بولوب ديريلمسى.
٢ - صدقڭ حياتِ إجتماعيۀ سياسيهده ئولمسى.
٣ - عداوته محبّت.
٤ - أهلِ ايمانى بربرينه باغلايان نورانى رابطهلرى بيلمهمك.
٥ - چشيد چشيد سارى خستهلقلر گبى إنتشار ايدن إستبداد.
٦ - منفعتِ شخصيهسنه همّتى حصر ايتمك.
بو آلتى دهشتلى خستهلغڭ علاجنى ده بر طب فاكولتهسى حكمنده حياتِ إجتماعيهمزه، أجزاخانۀ قرآنيهدن درس آلديغم «آلتى كلمه» ايله بيان ايدييورم. معالجهنڭ أساسلرى اونلرى بيلييورم.
برنجى كلمه:
«الأمل». يعنى رحمتِ إلٰهيهيه قوّتلى اُميد بسلهمك. أوت بن كندى حسابمه آلديغم درسه بناءً: أى إسلام جماعتى! مژده ويرييورم كه: شيمديكى عالمِ إسلامڭ سعادتِ دنيويهسى، باخصوص عثمانليلرڭ سعادتى و بِالخاصّه إسلامڭ ترقّيسى اونلرڭ إنتباهيله اولان عربڭ سعادتنڭ فجرِ صادقنڭ أمارهلرى إنكشافه باشلايور و سعادت گونشنڭ ده چيقماسى ياقينلاشمش.