بديع الزمان: بيتليسلىيم.
روس پوليسى: بو تيفليسدر!
بديع الزمان: بيتليس، تيفليس بربرينڭ قارداشيدر.
روس پوليسى: نه ديمك؟
بديع الزمان: آسياده عالمِ إسلامده اوچ نور بربرى آرقهسنده إنكشافه باشلايور. سزده بربرى اوستنده اوچ ظلمت إنقشاعه باشلايهجقدر. شو پردۀِ مستبدانه ييرتيلاجق، تقلّس ايدهجك، بن ده گلوب بوراده مدرسهمى ياپاجغم.
روس پوليسى: هيهات! شاشارم سنڭ اميديڭه.
بديع الزمان: بن ده شاشارم سنڭ عقلنه! بو قيشڭ دوامنه إحتمال ويرهبيلير ميسڭ؟ هر قيشڭ بر بهارى، هر گيجهنڭ بر نهارى واردر.
روس پوليسى: إسلام پارچه پارچه اولمش؟
بديع الزمان: تحصيله گيتمشلر. ايشته هندستان، إسلامڭ مستعد بر ولديدر؛ إنگليز مكتبِ إعداديسنده چاليشييور. مصر، إسلامڭ ذكى بر مخدوميدر؛ إنگليز مكتبِ ملكيهسندن درس آلييور. قافقاس و توركستان، إسلامڭ ايكى بهادر اوغللريدر؛ روس مكتبِ حربيهسنده تعليم ايدييورلر. إلى آخر...
ياهو، شو أصيلزاده أولاد، شهادتنامهلرينى آلدقدن صوڭره، هر برى بر قطعه باشنه گچهجك، محتشم عادل پدرلرى اولان إسلاميتڭ بايراغنى آفاقِ كمالاتده تموّج ايتديرمكله، قدرِ أزلينڭ نظرنده فلگڭ عنادينه، نوعِ بشردهكى حكمتِ أزليهنڭ سرّينى إعلان ايدهجكدر.
* * *